Berdaq atındaǵı Qaraqalpaq mámleketlik universitetinde «14-yanvar – Watan qorǵawshıları kúni» bayramı múnásibeti menen Jańa Ózbekstannıń rawajlanıwında hayal-qızlardıń, atap aytqanda, áskeriy hayal-qızlardıń ornın hám abırayın arttırıw, jaslardı Watansúyiwshilik ruwxında tárbiyalaw maqsetinde, “Jańa Ózbekstannıń Watansúyiwshi hayal-qızları” atamasında ashıq sáwbetlesiw keshesi bolıp ótti.
Onda Ózbekstan Respublikası Din isleri boyınsha komiteti, Qaraqalpaqstan Respublikası aymaqlıq basqarması hayal-qızlar máseleleri boyınsha jetekshi qánigesi H. Ibraimova, Arqa-batıs áskeriy okrugi hayal-qızlar hám áskerlerdiń shańaraqları menen islesiw boyınsha qánigesi G.Habibullaeva, Shańaraq hám hayal-qızlar komiteti qánigesi Sh.Yakupova hám áskeriy xızmetkerlerden N.Yuldasheva, III dárejeli serjant R.Aymuratova, kishi serjant N.Turaeva, III dárejeli serjant G.Baxtıbaevnalar miymanda boldı.
Bayram keshesin universitet rektorınıń hayal-qızlar máseleleri boyınsha másláhátshisi I.Seytnazarova ashtı hám ilaj qatnasıwshıların bayram menen qızǵın qutlıqladı.
Ol óziniń shıǵıp sóylegen sózinde búgingi kúni áskeriy xızmette xızmet etip atırǵan hayal-qızlardıń pidayılıq miyneti, Jańa Ózbekstanda hayal-qızlarǵa, sonıń ishinde, áskeriy hayal-qızlarǵa jaratılıp atırǵan keń imkaniyatlar haqqında ayrıqsha toqtap ótti.
Ilajda Ózbekstan Respublikası Din isleri boyınsha komiteti Qaraqalpaqstan Respublikası aymaqlıq basqarması hayal-qızlar máseleleri boyınsha jetekshi qánigesi H.Ibraimova shıǵıp sóylep, áskeriy hayal-qızlardıń Watan tınıshlıǵı hám paraxatshılıǵın tınıshlıǵın támiyinlewdegi múnásip úlesin atap ótti.
Sonday-aq, ilajda Arqa-batıs áskeriy okrugi, Shańaraq hám hayal-qızlar komiteti qánigeleri hám áskeriy xızmetker hayal-qızlar qatnasıp, áskeriy hayal-qızlardıń shańaraqtaǵı juwapkershiligi, jas áwladtı Watansúyiwshilik ruwxında tárbiyalawdaǵı ornı, jámiyetlik turmıstaǵı belsendiligi haqqında pikir-usınısların bildirdi.
Ilaj juwmaǵında áskeriy hayal-qızlardıń jumısın keńnen úgit-násiyatlaw, olardıń xızmetin qádirlew hám jaslardı Watanǵa muhabbat ruwxında tárbiyalaw boyınsha usınıslar ortaǵa taslandı hám studentler ózlerin qızıqtırǵan sorawlarına taraw qánigelerinen juwaplar aldı.

Adilbay Orazov,
Qaraqalpaqstan xabar agentligi sholıwshısı