14-yanvar – Watan qorǵawshıları kúni

Qońırat rayonındaǵı sport mektebinde 14-yanvar – Watan qorǵawshıları kúni múnásibeti menen sporttıń voleybol túri boyınsha jarıs ótkerildi.
Oǵan rayondaǵı huqıq qorǵaw uyımlarınıń xızmetkerlerinen dúzilgen komandalar qatnasıp, óz-ara bellesti.
Jarıstıń ashılıw máresiminde rayon hákiminiń orınbasarı A.Mamutov qatnasıp, jarıs qatnasıwshıların bayram menen qutlıqladı hám olarǵa áwmet tiledi.
Atap ótilgenindey, elimiz bárqulla óziniń márt, batır jigitleri menen maqtanıp kelgen. Jigitlerimiz ata-anasın hám shańaraǵın, ózi jasap atırǵan eldiń topıraǵın muqaddes bilip, Watanın qorǵaw ushın bárqulla tayar turıwdı parız dep bilgen. Bul bayramnıń belgileniwi xalqımızdıń óz milliy armiyasına bolǵan sheksiz húrmetin bildiredi.
Qızǵın hám mawasasız bellesiwlerge bay ótken jarıs juwmaqlarına bola 1-orındı Ishki isler bóliminiń, 2-orındı Ayrıqsha jaǵdaylar basqarması Qońırat rayonlıq bóliminiń, 3-orındı Milliy gvardiya qorǵaw bóliminiń komandaları iyeledi.
Jarıs jeńimpazları shólkemlestiriwshiler tárepinen diplom hám estelik sawǵaları menen sıylıqlandı.

Qaraqalpaqstan xabar agentligi