Qaraqalpaqstan Respublikası Pedagogikalıq sheberlik orayında Ámeliy pánler hám mektepten tısqarı tálim metodikası kafedrası tárepinen súwretlew óneri hám sızıw páni kursı tıńlawshıları ushın “Felting usılında súwret salıw texnologiyası: dástúriy hám zamanagóylik” atamasında sheberlik sabaǵı shólkemlestirildi.
Onda Qazaqstan Respublikası Jayhun qaraqalpaq etno-mádeniy birlespesiniń baslıǵı, Qazaq milliy dizayn akademiyasınıń akademigi, Evrodizayn awqamınıń aǵzası T.Salieva qatnasıp, tıńlawshılar ushın Felting (jún basıw) texnologiyası boyınsha ámeliy master-klass ótkerdi.
Sheberlik sabaǵınıń tiykarǵı maqseti – tıńlawshılardı ámeliy kórkem ónerge keńnen tartıw, qol miynetine bolǵan qızıǵıwshılıǵın arttırıw hám olardıń dóretiwshilik potencialın rawajlandırıwdan ibarat.
Master-klass procesinde felting texnikasınıń tiykarǵı túrleri, sonıń ishinde, ıǵal hám qurǵaq Felting usılları menen tanıstırılıp, olardı ámeliyatta qollanıw imkaniyatı jaratıldı.
Sabaq dawamında jún menen islew qaǵıydaları, materiallardı durıs tańlaw, reńler úylesimliligin támiyinlew hám forma beriw texnikası boyınsha túsinikler berildi.
Qatnasıwshılar óz qolları menen ápiwayı bezew buyımların hám suvenirlerdi tayarlap, ámeliy kónlikpelerin bekkemledi hám dóretiwshilik jumıs penen shuǵıllandı.

Qaraqalpaqstan xabar agentligi