Qaraqalpaqstan Respublikası Ekologiyalıq partiya shólkemi Keńesiniń májilisi bolıp ótti.
Oǵan Joqarǵı Keńes hám Xalıq deputatları qalalıq hám rayonlıq Keńesleriniń deputatları, partiya Keńesiniń, “Ekologiya hám salamatlıq” hayal-qızlar klubınıń aǵzaları hám “Jas ekologlar” qanatınıń wákilleri qatnastı.
Májiliste Qaraqalpaqstan Respublikası Ekologiyalıq partiya shólkeminiń baslıǵı A.Begimovanıń 2025-jıldaǵı jumıs nátiyjeleri boyınsha esabatı tıńlandı hám 2026-jılda ámelge asırılatuǵın jumıslar rejesi dodalandı.
Atap ótilgenindey, esap beriw dáwirinde partiyanıń shólkemlestiriwshilik potencialın bekkemlew, xalıqtı partiya qatarına keńnen tartıw hám orınlardaǵı jumıstı kúsheytiw boyınsha izbe-iz ilajlar ámelge asırıldı. Usı dáwir ishinde 137 baslanǵısh shólkem shólkemlestirildi hám 8 612 puqara partiya aǵzalıǵına qabıl etildi.
Ózbekstan Ekologiyalıq partiyası jumısında jaslardı partiya jumıslarına tartıw, olardıń jámiyetlik-siyasiy belsendiligin jáne ekologiyalıq sana-sezimi menen mádeniyatın arttırıw tiykarǵı baǵdarlardan biri boldı.
Partiya janında shólkemlestirilgen “Jas ekologlar” klubı tárepinen jıl dawamında 205 úgit-násiyat ilajları ótkerilip, olarǵa 6658 jas qamtıp alındı.
Partiya janındaǵı “Ekologiya hám salamatlıq” hayal-qızlar klubları tárepinen 177 úgit-násiyat ilajı ótkerilip, 4 mıń 512 hayal-qız hám jaslar tartıldı.
Úgit-násiyat jumısları partiya jumısınıń tiykarǵı baǵdarlarınan biri bolıp, jıl dawamında jámi 1077 ilaj shólkemlestirildi. Bul ilajlarǵa 34 mıńnan aslam puqara tartıldı.
Ekologiyalıq jaǵdaydı úyreniw hám jámiyetlik qadaǵalawdı támiyinlew maqsetinde respublika boylap 410 ekologiyalıq reyd ótkerildi. Reydler dawamında elatlı punktler hám sociallıq obektlerdiń átirapındaǵı ekologiyalıq jaǵdaylar úyrenildi.
Sonday-aq, ekologiyalıq nızamshılıqtıń orınlanıwın támiyinlew hám jámiyetlik qadaǵalawdı kúsheytiw maqsetinde 207 jámiyetlik tıńlaw hám qadaǵalaw ilajları shólkemlestirildi.
Deputatlar tárepinen xalıqtıń mápi, ekologiyalıq mashqalalardı sheshiw hám jámiyetlik qadaǵalawdı kúsheytiw tiykarǵı wazıypa sıpatında belgilenip, jıl dawamında 199 deputatlıq soraw jiberildi.
Keńes aǵzaları tárepinen, 2026-jılǵa mólsherlengen jumıslar rejesi dodalanıp, onda “Jasıl mákan” ulıwma milliy joybarı sheńberindegi ilajlar, ekologiyalıq úgit-násiyatlaw jumısları, xalıq penen islesiw hám deputatlıq jumısın jáne de jedellestiriw boyınsha anıq wazıypalar belgilendi.
Májilis juwmaǵında bildirilgen pikir-usınıslar tiykarında tiyisli qararlar qabıl etildi.

Qaraqalpaqstan xabar agentligi