Isbilermenler ushın salıq esabatın óz waqtında usınbaǵanı ushın qollanılatuǵın hákimshilik járiyma muǵdarları azaytıldı. Bul haqqında Salıq komiteti málim etti.

Atap ótiliwinshe, 2026-jıl 1-yanvardan baslap, eger isbilermen esap beriw dáwirinde bir neshe salıq túrleri boyınsha esabatlardı usınbaǵan bolsa, barlıq usınılmaǵan esabatlar ushın ulıwma bir járiyma qollanıladı. Burın hár bir salıq esabatı ushın óz aldına járiyma belgilengen edi.
Sonıń menen birge, salıq esabatın óz waqtında tapsırmaǵanı ushın belgilengen hákimshilik járiyma muǵdarları da qısqartıldı. Puqaralar ushın – 3 BEMnen 1 BEMge (412 mıń sum), kishi isbilermenlik subektleriniń lawazımlı shaxsları ushın – 10 BEMnen 3 BEMge (1 236 000 sum) quraydı.
Ámeldegi nızamshılıqqa muwapıq, kishi isbilermenlik subektleri kategoriyasına jeke tártiptegi isbilermenler, mikrofirmalar hám kishi kárxanalar kiredi.
Bunnan tısqarı, sońǵı 3 ay dawamında salıq esabatların óz waqtında tapsırǵan isbilermenlik subektlerine hákimshilik járiyma qollanılmastan salıq esabatın 5 kúnge shekem keshiktirip usınıwǵa ruqsat berildi.

Sh.Mamaturopova, ÓzA