Yaponiyanıń abıraylı joqarı oqıw orınlarınan biri – Osaka universitetiniń professorı, «National Geographic» jámiyetiniń koordinatorı Ken Ito Berdaq atındaǵı Qaraqalpaq mámleketlik universitetinde bolıp, bul jerde universitet rektorı Berdiyar Jollibekov penen ushırastı.
Ushırasıw dawamında tárepler joqarı bilimlendiriw hám ilim tarawında xalıqaralıq birge islesiwdi rawajlandırıw, atap aytqanda, ekologiya hám qorshaǵan ortalıqtı qorǵaw baǵdarında qospa joybarlardı ámelge asırıw máselelerin dodaladı. Professor Ken Ito keleshekte Qaraqalpaqstan aymaǵında ekologiyalıq mashqalalar bolǵan klimat ózgeriwi, qurǵaqshılıqtı úyreniw hám biologiyalıq hár túrlilikti saqlawǵa qaratılǵan xalıqaralıq ekologiyalıq joybarlarda birge islesiwge tayar ekenin bildirdi. Sonday-aq, ushırasıwda eki universitet arasında professor-oqıtıwshılar hám student-jaslardıń akademiyalıq mobilligin támiyinlew, óz-ara tájiriybe almasıw, qısqa hám uzaq múddetli stajirovkalar, qospa ilimiy izertlewler jáne seminar hám bayanatlar shólkemlestiriw máseleleri boyınsha óz-ara pikirlesti.
Bul baǵdarda bar imkaniyatlar hám perspektivalı baǵdarlar dodalanıp, keleshektegi birge islesiw boyınsha usınıslar bildirildi.
Rektor Berdiyar Jollibekov Berdaq atındaǵı Qaraqalpaq mámleketlik universiteti xalıqaralıq birge islesiwdi rawajlandırıwǵa ayrıqsha itibar qaratıp atırǵanın, ásirese, ekologiya, turaqlı rawajlanıw hám tábiyǵıy resurslardan aqılǵa uǵras paydalanıw tarawlarında jetekshi sırt el joqarı oqıw orınları menen birge islesiw universitet jumısınıń tiykarǵı baǵdarlarınan biri ekenin atap ótti.
Ushırasıw juwmaǵında tárepler óz-ara paydalı birge islesiwdi turaqlı dawam ettiriw, qospa baslamalardı basqıshpa-basqısh ámelge asırıw hám keleshekte anıq joybarlar sheńberinde birge islesiw baylanısların bekkemlew boyınsha kelisip aldı.

Qaraqalpaqstan xabar agentligi