Ózbekstan Respublikası Prezidentiniń 2020-jıl 7-dekabrdegi «Sudyalardıń shın mánisinde erkinligin támiyinlew jáne sud sistemasında korrupciyanıń aldın alıw nátiyjeliligin arttırıw ilajları haqqında»ǵı pármanı menen sistemada ashıq-aydınlıqtı támiyinlew, sonday-aq, ádil sudlawdı ámelge asırıwda úlgili jumıs islep atırǵan sudyalardı xoshametlewdi jolǵa qoyıw maqsetinde, hár jıldıń juwmaǵına bola, elimizde óz jumısında ayrıqsha órnek kórsetip, joqarı reyting kórsetkishlerine iye bolǵan sudyalarǵa “Ibratlı sudya” sıylıǵı tapsırılıp kelinbekte.
Prezidentimizdiń bul pármanınıń orınlanıwın támiyinlew maqsetinde, sudyalardıń jumıslarınıń nátiyjeliligin ashıq-aydın bahalaw boyınsha milliy elektron reyting bahalaw baǵdarlaması iske túsirildi. Bul elektron sistema insan faktorın keskin sheklewdiń esabınan sudyalardıń jumısların ashıq túrde hám eń áhmiyetlisi qalıs bahalaw múmkinshiligin jarattı. Nátiyjede 2025-jıldıń juwmaǵı boyınsha, Sudyalar Joqarǵı Keńesiniń qararı menen elimizdegi 14 sudya usınday sıylıqqa ılayıq dep tabıldı. Bunday joqarı húrmetke iye bolǵanlar arasında Qaraqalpaqstan Respublikası sudınıń sudyası Asqar Safarovtıń da bar ekenligi ayrıqsha maqtanıshlı.
Videokonferencbaylanıs túrinde ótkerilgen sıylıqlaw máresiminde, bul sıylıq Qaraqalpaqstan Respublikası sudınıń baslıǵı Kamal Tarixov tárepinen óz iyesine saltanatlı jaǵdayda tapsırıldı.
Maǵlıwmat ushın, búgingi kúni mámleketimiz boyınsha “Ibratlı sudya” sıylıǵı menen sıylıqlanǵan sudyalardıń sanı 82 ge jetti.

Qaraqalpaqstan xabar agentligi