Qaraqalpaqstan Respublikası Ministrler Keńesiniń Baslıǵı F.Ermanov Nókis qalasında jaslar menen ushırastı.
Bul ashıq sáwbetlesiw jaslardıń pikir hám baslamaların tıńlaw, olardı qızıqtırǵan máseleler boyınsha tikkeley sáwbetlesiw maqsetinde shólkemlestirilip, ushırasıw dawamında jaslar ózlerin qızıqtırǵan túrli máseleler boyınsha erkin pikir alısıp, usınıs hám baslamaların bildirdi.
Ushırasıwda Ministrler Keńesiniń Baslıǵı mámleketimizde jaslarǵa jaratılǵan keń imkaniyatlar, olardıń bilim alıwı, kásip-óner iyelewi, bántligi, isbilermenlik penen shuǵıllanıwı hám sociallıq belsendiligin arttırıw baǵdarında ámelge asırılıp atırǵan jumıslarǵa hár tárepleme toqtap ótti. Ushırasıw ashıq, konstruktivlik hám kóterińki ruwxta ótti.
Ushırasıwda 2025-jıl dawamında óziniń belsendiligi, intakerligi hám úlgili jumısı menen ajıralıp turǵan, eń úlgili jaslar jetekshileri “Top-100” dizimine kirgizilgen jaslar hám olardıń ata-analarına minnetdarshılıq xatları hám estelik sawǵaları saltanatlı túrde tapsırıldı.
Bul tán alıw jaslardı jáne de belsendi bolıwǵa shaqırıw, ata-analardıń perzentler tárbiyasındaǵı juwapkershiligin tán alıw, sonday-aq, jaslar menen ashıq pikirlesiwdi jolǵa qoyıw, olardıń jámiyetlik turmıstaǵı ornın bekkemlew hám keleshektegi tiykarǵı wazıypalardı belgilep alıwda úlken áhmiyetke iye boldı.

Qaraqalpaqstan xabar agentligi