Berdaq atındaǵı Qaraqalpaq mámleketlik universitetinde jámiyettiń rawajlanıwına úlken qáwip tuwdırıwshı illetlerden biri – korrupciyaǵa qarsı gúresiw máselelerine baǵıshlanǵan “Korrupciya keleshekke qáwip” atamasında ushırasıw hám úgit-násiyat ilajı bolıp ótti.
Onda Bas prokuratura janındaǵı Ekonomikalıq jınayatlarǵa qarsı gúresiw departamenti Qaraqalpaqstan Respublikası basqarması bólim baslıǵı Azamat Qıdırniyazov, Qaraqalpaqstan Respublikası Ádillik ministrliginiń huqıqıy málimleme sektorı baslıǵı Nuriya Berdiniyazova, jınayat isleri boyınsha Nókis qalalıq sudınıń tergew sudyası Dáwletyar Srajatdinov, sonday-aq, universitettiń professor-oqıtıwshıları hám juwapker xızmetkerler qatnastı.
Ilajdı Berdaq atındaǵı Qaraqalpaq mámleketlik universiteti rektorı Berdiyar Jollıbekov ashıp berdi.
Ol óziniń sózinde Ózbekstan Respublikası Prezidenti Shavkat Mirziyoevtiń Oliy Majlis hám Ózbekstan xalqına jollaǵan Múrájatında korrupciyaǵa qarsı gúresiw baslı baǵdarlardıń biri etip belgilengenligin, bul illetke qarsı gúresiw búgingi kúni tek ǵana mámleketlik siyasattıń tiykarǵı baǵdarlarınan biri emes, al, hár bir puqaranıń puqaralıq minneti ekenin aytıp ótti. Sonıń menen birge, bilimlendiriw shólkemlerinde hadallıq, ádillik, ashıq-aydınlıq hám nızam ústinligin támiyinlew korrupciyanıń aldın alıwdaǵı áhmiyetli faktor ekenin ayrıqsha atap ótti.
Ushırasıw dawamında taraw qánigeleri tárepinen korrupciyanıń kelip shıǵıw sebepleri, onıń sociallıq-ekonomikalıq aqıbetleri, sonday-aq, korrupciyalıq jaǵdaylardıń aldın alıw boyınsha ámeldegi nızamshılıq normaları hám juwapkershilik ilajları boyınsha hár tárepleme maǵlıwmatlar berildi. Ilaj sońında qatnasıwshılar tárepinen korrupciyaǵa qarsı gúresiwde bilimlendiriw shólkemleriniń ornı, professor-oqıtıwshılardıń juwapkershiligi hám jaslar sanasında hadallıq principlerin bekkemlew máseleleri boyınsha pikirlesti. Ótkerilgen ushırasıw korrupciyaǵa qarsı gúresiwde huqıqıy bilimdi arttırıw hám jámiyette salamat ortalıqtı qáliplestiriwge xızmet etetuǵını menen áhmiyetli boldı.

Qaraqalpaqstan xabar agentligi