Oliy Majlis Nızamshılıq palatasınıń Demokratiyalıq institutlar hám puqaralıq jámiyetin rawajlandırıw máseleleri komiteti tárepinen Bala huqıqları boyınsha wákil – Balalar ombudsmanınıń “Balalardıń ádil sudlawdan paydalanıw imkaniyatların támiyinlewdiń ayırım máseleleri haqqında”ǵı arnawlı bayanatı kórip shıǵıldı.
Elimizde balalardı qorǵaw, mámleketlik uyımlardıń jumısında balanıń eń baslı máplerin támiyinlew baǵdarında belgili bir ilajlar ámelge asırılıp kelinbekte.
Sonıń menen birge, balalardıń ádil sudlawdan paydalanıw imkaniyatların támiyinlew tarawında bar qáwip-qáterlerdiń aldın alıw, xalıqaralıq standartlardı milliy nızamshılıqqa nátiyjeli engiziw jumısların izbe-iz dawam ettiriw áhmiyetli wazıypa esaplanadı.
Bayanatta Balalar ombudsmanı tárepinen parlamentlik qadaǵalaw sheńberinde ótkerilgen monitoringler, sonday-aq, puqaralardan, sonıń ishinde, jas óspirim balalardıń ózinen kelip túsken múrájatlardı tallaw tiykarında jınayat islerin júrgiziwge hár qıylı processuallıq statusta tartılǵan balalardıń huqıqları menen nızamlı máplerin támiyinlewde bir qatar mashqalalardıń bar ekenligi kórsetip ótildi.
Atap aytqanda, ádil sudlaw sistemasında jas óspirimlerge baylanıslı jınayat isleri boyınsha tergewshi hám sudyalardı qánigelestiriw zárúr ekenligi aytıldı. Jınayat islerin júrgiziwde jas óspirimlerdi qamaqta saqlaw ámeliyatı, Balalar ombudsmanı jumısına baylanıslı nızam talaplarınıń orınlanıwı, sonday-aq, jas óspirimlerdiń jınısıy erkinligine qarsı jınayatlardıń aldın alıw sistemasında anıqlanǵan ayırım mashqalalı máselelerge ayrıqsha itibar qaratıldı.
Dodalawlar dawamında komitet aǵzaları tárepinen arnawlı bayanatta balalardıń ádil sudlawdan paydalanıw imkaniyatların keńeytiwge qaratılǵan huqıqıy hám shólkemlestiriwshilik ilajlar, jınayat islerin júrgiziwde balanıń nızamlı máplerin isenimli támiyinlew, balalarǵa qarata islengen jınayatlardıń aldın alıw boyınsha bir qatar pikir-usınıslar bildirildi.

M.Komilova, ÓzA