Bul haqqında Shıǵındılardı basqarıw hám aylanba ekonomikanı rawajlandırıw agentliginiń baspasóz xızmeti xabar berdi.
Xabarda atap ótiliwinshe, 2025-jıldıń juwmaqlarına bola, xalıq tárepinen shıǵındılardı alıp shıǵıp ketiw xızmetleri ushın esaplanǵan tólemlerdiń 90 procenti tólep berildi, sonday-aq, 200 milliard sumnan aslam real emes debitor qarızdarlıq sistemadan shıǵarıldı.
Shıǵındılardı alıp shıǵıp ketiw xızmetleri ushın xalıqtıń debitor qarızdarlıǵı 622,7 milliard sumdı quraydı.
Ótken jılı “Taza mákan” birden-bir elektron billing sisteması iske qosıldı. Bul sistema Birden-bir portal maǵlıwmatlar bazası menen integraciyalanıwı arqalı real emes debitor qarızdarlıqtıń payda bolıwınıń aldı alındı.
Atap aytqanda, ámelde kórsetilmegen xızmetler ushın esaplanǵan 211,9 milliard sumlıq real emes debitor qarızdarlıq elektron sistemadan shıǵarıldı.
2025-jıl 31-dekabr jaǵdayına bola, kórsetilgen xızmetler ushın xalıqqa esaplanǵan 1 trillion 454 milliard sumlıq tólemlerdiń 1 trillion 304 milliard sumı yamasa 90 procenti tólep berilgen.
Ótken jıldan baslap, qattı turmıslıq shıǵındılardı jıynaw hám alıp shıǵıp ketiw ushın tólemler boyınsha qarızdarlıq bar bolsa, qarızdarlıq tolıq qaplanǵanǵa shekem elektr energiyası ushın tólem qabıl etiw waqtınsha toqtatıladı.
Maǵlıwmat ornında aytıw kerek, 2026-jıl 1-yanvardan baslap shıǵındılar menen baylanıslı xızmetler ushın tólemler tek ǵana ámelde kórsetilgen xızmetler ushın onlayn tárizde ámelge asırıladı.

Sh.Mamaturopova, ÓzA