Búgingi kúnde sanlı texnologiyalar jedel rawajlanıp, elektron kommerciya mákanı keńeyip barmaqta. Sonlıqtan, bul baǵdardıń huqıqıy tiykarların jetilistiriw zárúr.
Nızamshılıq palatasınıń Innovaciyalıq rawajlanıw hám málimleme texnologiyaları máseleleri komiteti tárepinen elektron kommerciya tarawın jetilistiriwge qaratılǵan nızam joybarın dodalawǵa baǵıshlanǵan jumısshı topar májilisi ótkerildi.
Ekinshi oqıwǵa tayarlanıp atırǵan bul nızam joybarı elektron kommerciyanıń ashıq-aydın ekosistemasın jaratıw, elektron kommerciya platformaları hám servislerin jedel rawajlandırıw, ekonomikadaǵı jasırın aylanıslar kólemin qısqartıw, elektron kommerciya qatnasıqlarındaǵı ekonomikalıq máselelerdi bunnan bılay da jetilistiriwge qaratılǵan.
Májiliste tiyisli ministrlikler hám uyımlardıń wákilleri, siyasiy partiyalar frakciyalarınıń aǵzaları qatnasıwında nızam joybarı hár tárepleme kórip shıǵıldı. Ondaǵı ayırım normalar deputatlar tárepinen berilgen usınıslar tiykarında jetilistirilip, joybar teksti puqta jaǵdayǵa keltirilmekte.

ÓzA