Prezidentimizdiń Oliy Majlis hám Ózbekstan xalqına jollaǵan gezektegi Múrájatında mámleket ekonomikasınıń strategiyalıq tarmaqların izbe-iz rawajlandırıw, sonıń ishinde, neft-gaz tarawın modernizaciyalaw hám onıń nátiyjeliligin arttırıwǵa qaratılǵan áhmiyetli wazıypalar belgilep berildi. Bul hújjette alǵa qoyılǵan tiykarǵı baǵdarlardı orınlarda keńnen úgit-násiyatlaw, olardıń mazmun-mánisin miynet jámáátlerine tereń jetkeriw hám ámeliy orınlawǵa baǵdarlaw maqsetinde tarawda bir qatar shólkemlestiriwshilik-ámeliy ilajlar ótkerilmekte.
“Ózbekneftgaz” akcionerlik jámiyeti sistemasındaǵı “Ózlitineftgaz” akcionerlik jámiyetinde ótkerilgen ruwxıy-aǵartıwshılıq ilaj da olardan biri bolıp esaplanadı.
Ilajda Oliy Majlis Senatınıń Byudjet hám ekonomikalıq máseleler komitetiniń baslıǵı Erkin Gadoev, Nızamshılıq hám huqıqıy siyasat institutı hám “Ózbekneftgaz” AJnıń Korrupciyaǵa qarsı ishki qadaǵalaw departamenti wákilleri qatnastı.
Seminarda mámleketimiz basshısınıń Múrájatında belgilep berilgen tiykarǵı baǵdarlar, reformalardıń mánisi hám olardıń neft-gaz tarawındaǵı áhmieti hár tárepleme tallandı.
Atap aytqanda, neft-gaz tarmaǵında óndirislik quwatlıqların arttırıw, jańa kánlerdi ózlestiriw, zamanagóy hám energiya únemlewshi texnologiyalardı engiziw, investiciyalıq ortalıqtı bunnan bılay da jaqsılaw jáne iri investiciyalıq joybarlardı nátiyjeli ámelge asırıw máselelerine ayrıqsha itibar qaratıldı.
Sonday-aq, lokalizaciyalaw processlerin keńeytiw, ishki bazar talapların qanaatlandırıw hám importtıń ornın basatuǵın ónimler islep shıǵarıwdı rawajlandırıw wazıypaları dodalandı.
Seminar dawamında kadrlar potencialın arttırıw, tarawda maman qánigeler tayarlaw, jas kadrlardı qollap-quwatlaw hám ilimiy-izertlew jumısların óndiris penen úzliksiz baylanıstırıw máseleleri de kún tártibinen orın aldı. Qatnasıwshılar bul wazıypalar neft-gaz tarawınıń turaqlı rawajlanıwı, básekige shıdamlılıǵın arttırıw hám ekonomikanıń strategiyalıq tarmaqlarınan biri sıpatında onıń ornın bekkemlewde úlken áhmiyetke iye ekenin atap ótti.
Ilaj juwmaǵında Prezident Múrájatında belgilengen wazıypalardı ámelge asırıw boyınsha ámeliy ilajlardı kúsheytiw, tarawda ashıq-aydınlıqtı támiyinlew hám korrupciyaǵa qarsı gúresiw máselelerinde sistemalı jumıslardı dawam ettiriw zárúrligi atap ótildi.

N.Ziyodullaeva, ÓzA