Respublikamız boylap mámleket turmısında úlken áhmiyetke iye bolǵan siyasiy hújjet – Ózbekstan Respublikası Prezidenti Shavkat Mirziyoevtiń Oliy Majlis hám Ózbekstan xalqına jollaǵan Múrájatında belgilengen tiykarǵı wazıypalardıń mazmun-mánisine baǵıshlanǵan úgit-násiyat ilajları bolıp ótpekte.
Usınday ilajlardıń biri Berdaq atındaǵı Qaraqalpaq mámleketlik universitetiniń májilisler zalında Ózbekstan Xalıq demokratiyalıq partiyasınıń baslaması menen ótkerildi. Onda partiyanıń jergilikli shólkemleriniń basshıları hám xızmetkerleri, plenum hám atqarıw komitetiniń aǵzaları, Qaraqalpaqstan Respublikası Joqarǵı Keńesindegi partiya frakciyası, xalıq deputatları rayonlıq hám qalalıq Keńeslerindegi partiya toparlarınıń aǵzaları, partiya belsendileri, jámiyetshilik wákilleri hám ǵalaba xabar qurallarınıń wákilleri qatnastı.
Ilaj dawamında Prezident Múrájatında belgilengen mámleketti sociallıq-ekonomikalıq rawajlandırıw, xalıqtıń abadanlıǵın arttırıw, sociallıq ádillikti támiyinlew, insan qádirin ulıǵlaw, mámleketlik basqarıwda ashıq-aydınlıq hám nátiyjelilikti kúsheytiwge qaratılǵan tiykarǵı wazıypalar hár tárepleme dodalandı.
Sonday-aq, bilimlendiriw, densawlıqtı saqlaw, bántlik, sociallıq qorǵaw hám sociallıq kepillikler tarawlarında belgilengen baǵdarlardı turmısqa engiziwde Ózbekstan Xalıq demokratiyalıq partiyasınıń parlament hám jergilikli Keńesler dárejesindegi ámeliy qatnasıwı máselelerine ayrıqsha itibar qaratıldı.
– Múrájattıń mazmun-mánisi menen bárinen burın xalıq máplerine xızmet etetuǵın, anıq nátiyjege baǵdarlanǵan reformalar dáwirine kirgenimizdi jáne bir márte tastıyıqladı. Bul processte siyasiy partiyalardıń, atap aytqanda, Ózbekstan Xalıq demokratiyalıq partiyasınıń ornı hám juwapkershiligi ayrıqsha áhmiyetke iye. Onda sociallıq qorǵawdı kúsheytiw, kámbaǵallıqtı qısqartıw, xalıqtı dáramatlı etiw, máhállelerdi rawajlandırıw hám jańa miynet bazarın qáliplestiriw sıyaqlı tiykarǵı baǵdarlar belgilep berildi. Bul wazıypalar Xalıq demokratiyalıq partiyasınıń baǵdarlamalıq maqsetleri hám sociallıq baǵdarlanǵan siyasiy poziciyası menen tıǵız baylanıslı, – deydi Ózbekstan Xalıq demokratiyalıq partiyası Qaraqalpaqstan Respublikası Keńesiniń baslıǵı, Qaraqalpaqstan Respublikası Joqarǵı Keńesindegi partiya frakciyasınıń basshısı Xalilla Eshimbetov. – Usı mánide partiyanıń tiykarǵı wazıypası Múrájatta belgilengen baǵdarlardı orınlarda durıs túsindiriw, xalıqqa jetkeriw hám olardı ámelge asırıw procesinde belsene qatnasıwdan ibarat. Bul, bárinen burın, partiya deputatları arqalı jergilikli keńeslerde anıq usınıslar kirgiziw, sociallıq áhmiyetke iye qararlar qabıl etiliwinde intaker bolıwdı talap etedi.
Ilaj qatnasıwshıları Múrájatta belgilengen wazıypalardı orınlarda nátiyjeli ámelge asırıw, xalıq penen ashıq-aydın pikirlesiwdi kúsheytiw, jámiyetlik qadaǵalaw mexanizmlerin rawajlandırıw boyınsha óz pikir-usınısların bildirdi.
Ilaj juwmaǵında Prezident Múrájatında belgilengen wazıypalardı turmısqa engiziwde partiya shólkemleriniń belsendiligin arttırıw, jámiyetshilik penen birge islesiwdi bunnan bılay da bekkemlew boyınsha anıq usınıslar bildirildi.

Qaraqalpaqstan xabar agentligi