Ishki isler tarawında uzaq jıllar xızmet etken nuranıy xızmetkerler menen «Úsh áwlad ushırasıwı»n ótkeriw dástúrge aylanǵan. Arqa-batıs áskeriy okruginiń Nókis garnizonında Watansúyiwshilik aylıǵı sheńberinde ótkerilgen ushırasıw usı iygilikli maqsetlerdiń úzliksiz dawamı boldı.

«Xalıq penen armiya bir tán bir jan» súreni astında ótkerilgen ilajda óz tarawında úlken tájiriybege iye ustazlar, urıs hám miynet veteranları, Qurallı Kúshler qatarında xızmet etip atırǵan oficer hám áskerler qatnastı.
Elimizdegi tınıshlıq, jaslardıń tálim-tárbiyası ushın jaratılǵan sharayatlar hám olardan nátiyjeli paydalanıw boyınsha zárúrli usınıslar berildi. Álbette bunday ushırasıwlar jaslarda watansúyiwshilik, húrmet, mehir-múriwbet sıyaqlı sezimlerdi qáliplestiriw, jası úlkenlerdiń turmıslıq tájiriybesinen sabaq alıw maqsetin qamtıp alıp, usı arqalı áwladlar arasında awızbirshilik hám tilekleslik bekkemlenedi.
«Úsh áwlad ushırasıwı»nda nuranıylar óz dáwirindegi qıyınshılıqlar, xızmettegi mashaqqatlar hám nuranıylıq dáwirinde mámleketimiz basıshısı tárepinen kórsetilip atırǵan húrmet haqqında toqtap, ózleriniń pikirlerin bildirdi, turmıslıq tájiriybeleri menen bólisti. Elimizde reformalardı ámelge asırıwda Prezidentimizge qol qanat bolıw kerekligi sáwbettiń bas temasına aylandı.
Ilaj dawamında jaslar tárepinen berilgen sorawlarǵa hár tárepleme juwaplar berildi. Bul bolsa qatnasıwshılarǵa bir-birin jáne de jaqsıraq túsiniw, armiyaǵa bolǵan isenim hám húrmetti bekkemlew imkaniyatın berdi. Sonday-aq, Watansúyiwshilik ruwxındaǵı qosıqlar, nama-qosıqlar hám saxnalıq kórinisler ilajǵa ayrıqsha payız baǵıshladı.
Juwmaǵında belsene qatnasqan veteranlar hám áskeriy xızmetkerler minnetdarshılıq jarlıqları menen sıylıqlandı. Barlıq qatnasıwshılar bunday ushırasıwlar jaslardıń sanasında salamat dúnyaqarastı qáliplestiriw, xalıq hám armiya birligin bunnan bılay da bekkemlewde úlken áhmiyetke iye ekenin ayrıqsha atap ótti.

Qaraqalpaqstan xabar agentligi