Ájiniyaz atındaǵı Nókis mámleketlik pedagogikalıq institutında Ózbekstan Respublikası Prezidenti Shavkat Mirziyoevtiń Oliy Majlis hám xalqımızǵa jollaǵan Múrájatında jaslardıń tálim-tárbiyası, olardıń bilimin jetilistiriw, zamanagóy kásip-óner iyelewi hám ruwxıy jetikligin támiyinlew boyınsha belgilengen baslı wazıypalardı dodalawǵa arnalǵan seminar shólkemlestirildi.

Seminarǵa institut fakultetleri dekanlarınıń jaslar menen islesiw boyınsha orınbasarları, hayal-qızlar másláhátshileri, tyutorlar, profilaktikalıq inspektorlar, psixologlar, Jaslar awqamı baslanǵısh shólkeminiń juwapkerleri qatnastı.
Ilajda instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Quvondiq Qodirov Múrájatta jaslar menen islesiw sistemasın jetilistiriw, bilimlendiriwdiń sapasın arttırıw, bilimli, keń oy-órisli, intáker hám Watanǵa sadıq jaslardı tárbiyalawǵa baǵdarlanǵan áhmiyetli wazıypalarǵa keń túrde toqtaldı.
Atap aytqanda, bilimlendiriw procesin xalıqaralıq standartlar tiykarında jetilistiriw, zamanagóy ilimiy-texnikalıq tabıslardan nátiyjeli paydalanıw, sanlı kónlikpelerdi rawajlandırıw, ilim menen óndiristiń integraciyasın kúsheytiw sıyaqlı baǵdarlar boyınsha pikir alıstı.
Seminarda jaslardıń ruwxıy dárejesin kóteriw, olardı jat ideyalardan qorǵaw, salamat turmıs tárizine keńnen tartıw, huqıqıy sana hám mádeniyattı jetilistiriw boyınsha sistemalı jumıslardı bunnan bılay da kúsheytiw zárúrligi atap ótildi. Sonday-aq, korrupciyaǵa qarsı gúresiw, hadallıq principlerin sińdiriw, juwapkershilikli hám sociallıq belsendi shaxs sıpatında kamalǵa keltiriw baǵdarındaǵı wazıypalar ayrıqsha kórsetip ótildi.
Ilaj dawamında institutta jaslar menen islesiwdiń nátiyjeliligin arttırıw, tálim-tárbiya procesin jetilistiriw, qábiletli studentlerdi qollap-quwatlaw, ilimiy izertlewler hám baslamalardı xoshametlew boyınsha anıq rejeler belgilep alındı.
Seminar sońında Prezident Múrájatında alǵa qoyılǵan wazıypalardı institut turmısı hám bilimlendiriw procesine basqıshpa-basqısh engiziw, jaslardıń máplerine xızmet etetuǵın ámeliy baslamalardı keńeytiw boyınsha tiyisli tapsırmalar berildi.

Qaraqalpaqstan xabar agentligi