Ózbekstan ilimiy-sınaw hám sapa qadaǵalaw orayı IQNet xalıqaralıq sertifikatlaw tarmaǵında associaciyalanǵan aǵza statusına iye boldı. Bul elimizde engizilgen menedjment sistemalarınıń xalıqaralıq maydanda tán alınıwı hám eksport potencialınıń artıwında áhmiyetli qádem bolıp esaplanadı.
Bul status orayǵa IQNet jumısında keń kólemli qatnasıw, xalıqaralıq tájiriybe almasıw hám birge islesiw imkaniyatların keńeytiw imkaniyatın beredi.
IQNet xalıqaralıq sertifikatlastırıw shólkemi 1990-jılı shólkemlestirilgen bolıp, 36 jetekshi menedjment sistemaları sertifikatlastırıw uyımların birlestiredi. 150 den aslam mámlekette 310 mıńnan aslam sertifikat rásmiylestirilgen. Bul dúnyanıń derlik 30 procent bazarın qamtıp almaqta.
IQNet aǵzaları qatarında Ispaniya, Franciya, Germaniya, Yaponiya, Qıtay, Koreya, Túrkiya, Shveycariya hám basqa da bir qatar mámleketlerdiń abıraylı sertifikatlastırıw uyımları bar. Sonday-aq, tarmaq 30 dan aslam tilde audit ótkeriw imkaniyatına iye 17 mıńnan aslam xalıqaralıq auditor hám ekspertlerden ibarat.
Qánigelerdiń atap ótiwinshe, IQNet tarmaǵına aǵza bolıw Ózbekstanda engizilgen basqarıw sistemalarınıń eksport bazarlarında tán alınıwın támiyinleydi. Mámlekettiń globallıq sapa indeksindegi ornın arttıradı hám xalıqaralıq standartlarǵa sáykes maman kadrlar tayarlawǵa xızmet etedi. Sonday-aq, bul aǵzalıq sawda baylanısların rawajlandırıw hám qarıydarlardıń isenimin arttırıwda da ayrıqsha áhmiyetke iye.

Sh.Mamaturopova,
ÓzA