Ózbekstan Respublikası Prezidentiniń 2025-jıl 1-dekabrdegi 70-sanlı biyligi menen tastıyıqlanǵan «Ózbekstan Respublikası Qurallı Kúshleri dúzilgeniniń 34 jıllıǵı hám 14-yanvar – Watan qorǵawshıları kúni bayramına tayarlıq kóriw hám onı joqarı dárejede ótkeriw haqqında»ǵı baǵdarlamanıń orınlanıwın támiyinlew maqsetinde, Berdaq atındaǵı Qaraqalpaq mámleketlik universitetinde “Meniń ákem – Watan qorǵawshısı” atamasında ruwxıy-aǵartıwshılıq keshesi bolıp ótti.

Keshede Arqa-batıs áskeriy okrugine qaraslı 17071-áskeriy bólimi xızmetkeri, leytenant A.Twlqinbaev, Qorǵanıw ministrligi janındaǵı Jámiyetlik keńestiń Qaraqalpaqstan Respublikası aymaqlıq bóliminiń qánigesi, ishki isler mayorı G.Palvanova, sonday-aq, usı áskeriy bólimniń 2-dárejeli serjantı J.Axmedov húrmetli miyman sıpatında qatnastı.
– Bul ilaj jas áwlad qálbinde Watansúyiwshilik sezimlerin jáne de bekkemlew, tuwılǵan jerge sadıqlıq, mártlik hám pidayılıq sıyaqlı joqarı pazıyletlerdi úgit-násiyatlaw, áskeriy xızmetkerlerdiń abıraylı hám juwapkershilikli miynetin keń jámiyetshilikke jetkeriw maqsetinde shólkemlestirildi, – deydi fizika fakulteti dekanınıń orınbasarı P.Nurniyazov.
Ushırasıw dawamında miymanlar ózleriniń xızmet wazıypası, áskeriy minnettiń juwapkershiligi, Watan qorǵawshısı bolıwdıń maqtanıshlı tárepi, shańaraqta, ásirese, perzentler tárbiyasında áskeriy xızmetkerlerdiń ornı haqqında keń túrde aytıp berdi.
Ilajda student-jaslar tárepinen áskeriy xızmetkerlerge sorawlar berilip, olarǵa tiyisli juwap aldı. Ótkerilgen bul ushırasıw keshesi studentlerdiń sanasında Watansúyiwshilik sezimlerin kúsheytip, milliy Armiyamız hám onda xızmet etip atırǵan Watan qorǵawshılarına bolǵan húrmet tuyǵısın joqarılattı.

Qaraqalpaqstan xabar agentligi