Ózbekstanda ilim hám innovaciyalardı rawajlandırıw mámleketlik siyasattıń tiykarǵı baǵdarlarınan birine aylanbaqta. Ásirese, ekologiya, suw resursları hám Aralboyı regionın turaqlı rawajlandırıw máseleleri tek ǵana ilimiy emes, al sociallıq-ekonomikalıq áhmiyetke iye bolmaqta.
Usı kózqarastan, Ózbekstan Respublikası joqarı bilimlendiriw, ilim hám innovaciyalar ministriniń orınbasarı Wktam Salomov Qaraqalpaqstan Respublikasına xızmet saparı sheńberinde usı máselelerge itibar qarattı.
Xızmet saparı sheńberinde Wktam Salomov Ózbekstan Ilimler akademiyasınıń Qaraqalpaqstan bóliminde bolıp, usı mákemeniń ilimiy potencialı hám jumısı menen jaqınnan tanıstı. Bólim baslıǵı, akademik Ahmed Reymov penen bolıp ótken ushırasıwda aymaqta alıp barılıp atırǵan ámeliy izertlewler dodalandı.
Qaraqalpaqstan bólimi ilimpazları tárepinen alıp barılıp atırǵan ilimiy izleniwler, bárinen burın, regionnıń eń áhmiyetli mashqalaları – ekologiyalıq turaqlılıq, suw jetispewshiligi, biokóptúrlilikti saqlaw hám Aralboyı aymaǵın tiklew hám turaqlı rawajlandırıw máselelerine qaratılǵanı menen áhmiyetli. Bul izertlewler tábiyǵıy resurslardan aqılǵa uǵras paydalanıw, xalıqtıń salamatlıǵın qorǵaw hám ekologiyalıq qáwipsizlikti támiyinlewde áhmiyetli ilimiy tiykar bolıp xızmet etpekte.
Aral teńiziniń qurıwı aqıbetleri búgingi kúnde pútkil Oraylıq Aziya ushın globallıq mashqala sıpatında tán alınadı. Sonlıqtan, Ilimler akademiyası Qaraqalpaqstan bóliminde alıp barılıp atırǵan izertlewler tek ǵana regionallıq emes, al xalıqaralıq kólemde de áhmiyetli.
Ushırasıw dawamında suw resursların basqarıw, shólleniw processlerin azaytıw, jasıl aymaqlardı keńeytiw, shorlanǵan jerlerdi qayta tiklew boyınsha ilimiy qollanbalar dodalandı. Bul baǵdarlarda ilim hám ámeliyat arasındaǵı tıǵız baylanıstı kúsheytiw zárúrligi ayrıqsha atap ótildi.
Wktam Salomov óziniń shıǵıp sóylegen sózinde Prezidentimizdiń basshılıǵında ilim hám innovaciyalar tarawına qaratılıp atırǵan sistemalı itibarǵa toqtap ótti. Ilimler akademiyasınıń jumısın rawajlandırıwǵa qaratılǵan qarar hám pármanlar ilimiy mákemelerdiń materiallıq-texnikalıq bazasın bekkemlew, ilimpazlardıń sociallıq abırayın arttırıw hám ilimiy nátiyjelerdi ámeliyatqa engiziwde áhmiyetli faktor bolıp atırǵanı atap ótildi.
Sapar etiw juwmaǵında jas ilimpazlardı qollap-quwatlaw, ilimiy grantlar sanın arttırıw, startap joybarlardı qarjılandırıw hám xalıqaralıq ilimiy birge islesiwdi keńeytiw boyınsha keleshektegi rejeler dodalanıp, kelisimlerge erisildi. Bul bolsa Aralboyı mashqalalarına ilimiy tiykarlanǵan sheshimler islep shıǵıwda áhmiyetli qádem bolıwı kútilmekte.

Dildora DWSMATOVA, ÓzAnıń xabarshısı