Elimizdiń tınıshlıǵın qorǵawda milliy armiyamızdıń tutqan ornı ayrıqsha. Márt, Ana jurtqa sadıq xızmet etip atırǵan áskerlerimizdiń xızmetlerin qansha maqtanısh etseń arzıydı. Hár jılı 14-yanvar kúni Watan qorǵawshıları kúni elimiz boylap keń túrde belgilenip kelinbekte. Áyne payıtta orınlarda bayram nápesi baslanıp, hár qıylı ilajlar ótkerilmekte.

Taqıyatas rayonı áskeriy bóliminde “Milliy armiya – Ana jurt qalqanı, tınıshlıǵımız saqshısı!” súreni astında “Úsh áwlad ushırasıwı” ilajı bolıp ótti. Ilajda rayon hákimligi, “Nuranıy” qorı, Ruwxıylıq hám aǵartıwshılıq orayı wákilleri, áskeriy xızmetkerler, áskerler, jaslar hám 4-sanlı ulıwma bilim beriw mektebiniń “Batırlıq mektebi” oqıwshıları qatnastı.
Ilajda Taqıyatas rayonı hákiminiń birinshi orınbasarı S.Allambergenov shıǵıp sóylep, ushırasıwdı ashıp berdi. Ol óz sózinde tınıshlıq hám abadanshılıqtı saqlaw, jas áwladtı Watanǵa muhabbat hám watansúyiwshilik ruwxında tárbiyalawda áskerler hám nuranıylardıń ornı áhmiyetli ekenin atap ótti. Ótkerilgen ushırasıw keshesinde sózge shıqqanlar elimizdegi tınıshlıq hám turaqlılıqtı támiyinlewde Prezidentimiz basshılıǵında alıp barılıp atırǵan keń kólemli reformalardıń áhmiyeti, Ana Watandı súyiw hám tınıshlıǵımızdı qorǵawda milliy armiyanıń tutqan ornı haqqında atap ótip, bul joldı dawam etiwde kópti kórgen nuraniy jasúlkenlerdiń másláhátleri hám keleshek áwladtı Watansúyiwshilik ruwxta tárbiyalaw zárúr ekenligi sóz etildi.
Ilaj juwmaǵında rayonlıq Mádeniyat bólimi tárepinen tayarlanǵan koncert baǵdarlaması qoyıp berildi. Ushırasıw keshesi jaslarda Watanǵa sadıqlıq, maqtanısh hám juwapkershilik sezimlerin bekkemlewge xızmet eteri sózsiz.

Qaraqalpaqstan xabar agentligi