Qıtaydıń BYD kompaniyası 2025-jıldıń juwmaqlarına bola Ilon Mask basshılıǵındaǵı Teslanı artta qaldırıp, dúnyadaǵı eń iri elektromobil islep shıǵarıwshısına aylandı. BYD jıl dawamında jámi 2,26 million tolıq elektr avtomobil satqan bolsa, Tesla 1,63 million dana ǵana qalǵan. Tesla sawdaları ásirese jıl aqırında tómenlegen hám ulıwma nátiyjeler 2024-jılǵa salıstırǵanda 9 procentke azayǵan.

BYDnıń rawajlanıwı Qıtay avtomobil sanaatınıń globallıq básekide basımlıq etip atırǵanın kórsetedi. Kompaniya gibrid avtomobiller, elektr avtobuslar hám júk mashinaları sawdasın da arttırıp, barlıq túrdegi avtomobiller boyınsha 4,55 million dana nátiyjege erisken. Bunıń menen BYD tek ǵana ayırım kvartallarda emes, al 2025-jılda tolıq elektr modeller islep shıǵarıwda da Teslanı artta qaldırdı.
Teslanıń tómenlewi bolsa AQSh siyasatı, atap aytqanda Tramp dáwirinde elektromobillerdi xoshametlewshi subsidiyalar hám ekologiyalıq qaǵıydalardıń biykar etiliwi menen baylanıslı. Sonıń menen birge, BYDdiń tabısı Qıtay kompaniyalarınıń globallıq elektromobil bazarında kúsheyip atırǵanın kórsetedi.

Madinabonu Nasrieva, Uluǵbek Twxtaev, ÓzA