Nókistegi 55-sanlı ulıwma bilim beriw mektebinde “Sanlı áwlad qızları” tańlawınıń Qaraqalpaqstan Respublikası basqıshı shólkemlestirildi.

Jámiyette hayal-qızlardıń belsendiligin arttırıw, olardıń sanlı texnologiyalar baǵdarındaǵı bilimlerin bayıtıw hám bul baǵdarda joqarı nátiyjelerge erisip atırǵan jaslardı qollap-quwatlaw maqsetinde ótkerilip atırǵan tańlawda qatnasıwshılar 16 – 20 jas hám 21 – 30 jas kategoriyaları boyınsha bellespekte.
2021-jıldan berli dástúriy tárizde ótkerilip kiyatırǵan bul tańlaw hayal-qızlardıń málimleme texnologiyaları tarawındaǵı bilim hám mamanlıǵın arttırıw, olardı zamanagóy kásiplerge baǵdarlaw jáne islep shıǵılǵan ideya hám joybarların qollap-quwatlawǵa qaratılǵan.
– Prezidentimizdiń 2025-jıl 15-maydaǵı “Balalarǵa mólsherlengen milliy kontentlerdi jaratıw hám olardı ǵalaba en jaydırıwdı qollap-quwatlaw ilajları haqqında”ǵı qararı tiykarında bıyıl tańlaw jetilistirildi. Yaǵnıy sanlı texnologiyalar, kontent jaratıw menen baylanıslı zamanagóy kásiplerdi ielewge qızıǵıwshılıǵı joqarı bolǵan oqıwshı-jaslardı qollap-quwatlaw, tańlap alıw maqset etilgen. Sol sebepli endi “Sanlı áwlad qızları” tańlawı da usı baslama sheńberinde ótkeriledi hám tańlaw jeńimpazları sırt mámleketlerge bilimlendiriw saparına jiberiledi. Quwanıshlı tárepi, respublikamızda bıyılǵı tańlawda qatnasıw ushın 6 mıń 122 qatnasıwshı dizimnen ótken. Talabanlar tárepinen bilimlendiriw baǵdarında 1 mıń 968 joybar, jasalma intellekt boyınsha 2 mıń 175 joybar, klimattıń ózgeriwi boyınsha 862 joybar hám jasıl ekonomika baǵdarına baylanıslı 1 mıń 117 joybar usınıldı. Qatnasıwshılar arasında mektep oqıwshıları, studentler, MKT tarawına qızıǵıwshı studentler bar, – deydi Qaraqalpaqstan Respublikası Mektepke shekemgi hám mektep bilimlendiriw ministrligi Málimleme kommunikaciya texnologiyaların engiziw hám sanlastırıw sektorı baslıǵı Begdiyar Tleuov.
Tańlaw qatnasıwshılarınıń joybarları taraw qánigeleri, mektep hám joqarı bilimlendiriw mákemeleriniń professor-oqıtıwshıları tárepinen bahalanıp barılmaqta. Ótken jılı noyabr ayında tańlawdıń rayon (qala) lıq basqıshı bolıp ótken edi. Bul basqıshta eń jaqsı dep tabılǵan hám joqarı bahalanǵan 124 qatnasıwshı joybarı Qaraqalpaqstan Respublikası basqıshına usınıs etildi.
Processte tóreshiler quramı tárepinen hár bir qızdıń joybarları tiyisli tártipte bahalanbaqta. Juwmaǵında jeńimpazlar tańlawdıń Respublikalıq basqıshında qatnasadı.

Qaraqalpaqstan xabar agentligi