Senattıń jáne bir nızamshılıq usınısı – parlamentlik qadaǵalaw jumısınıń tiykarların jáne de bekkemlewge qaratılǵan usınıs tómengi palata májilisinde kórip shıǵıldı.

Atap ótilgenindey, bul nızam joybarı menen “Ózbekstan Respublikası Oliy Majlisiniń Senatı haqqında”ǵı Konstituciyalıq nızamǵa Senat komitetleri tárepinen mámleketlik uyımlar hám olardıń lawazımlı shaxslarınıń Konstituciya hám nızamlardı, mámleketlik baǵdarlamalardıń orınlanıwı boyınsha málimlemesin tıńlaw wákilligin bekkemlewge qaratılǵan ózgeris kirgizilmekte.
Sonday-aq, “Ózbekstan Respublikası Oliy Majlisi Nızamshılıq palatası deputatınıń hám Senat aǵzasınıń statusı haqqında”ǵı nızamǵa dúzetiw kirgizilip, deputat hám senator palataǵa esap beriwshi uyım yamasa lawazımlı shaxstıń esabatı yamasa málimlemesin tek ǵana palata májilisinde emes, al endi ózi aǵza bolǵan komitet májilislerinde de tıńlaw haqqında usınıs kirgiziw huqıqı názerde tutılmaqta.
Bunnan tısqarı, “Parlamentlik qadaǵalaw haqqında”ǵı nızamnıń tiyisli statyalarına ózgeris kirgizilmekte. Oǵan bola, Nızamshılıq palatası hám Senattıń komitetleri tárepinen mámleketlik uyımlar hám olardıń lawazımlı shaxslarınıń Konstituciya hám nızamlardı, Oliy Majlis palataları hám olardıń uyımları qararların, mámleketlik baǵdarlamalardı orınlaw, sonday-aq, ózlerine júklengen wazıypalar menen funkciyalardı ámelge asırıw boyınsha málimlemesin tıńlaw wákilligi anıq belgilenbekte.
Sonıń menen birge, “Ministrler Kabineti haqqında”ǵı nızamǵa da ózgerisler kirgiziw usınıs etilmekte. Yaǵnıy, komitet májilislerinde mámleketlik uyımlar hám olardıń lawazımlı shaxslarınıń málimlemesin tıńlawda Húkimet tiyisli basshılardıń qatnasıwın támiyinleytuǵını sáwlelenbekte.
Atap ótilgenindey, nızam joybarı Oliy Majlis palatalarınıń parlamentlik qadaǵalawǵa baylanıslı wákilliklerin bekkemlew, mámleketlik uyımlar hám olardıń lawazımlı shaxslarınıń óz jumısı boyınsha juwapkershiligin hám esap beriwin arttırıwǵa jáne Konstituciya hám nızamlar, mámleketlik baǵdarlamalardıń orınlanıwı boyınsha parlament tárepinen sistemalı qadaǵalaw ornatılıwına xızmet etedi.

ÓzA