2025-jıldıń 19-sentyabr kúni Ózbekstan Respublikası Prezidenti tárepinen “Ózbekstan Respublikasında xalıqtı hám awıl xojalıǵın dizimge alıw ilajın ótkeriw haqqında”ǵı PP-173-sanlı pármanı qabıl etildi. Usı pármanǵa muwapıq, Ózbekstanda 2026-jıl 15-yanvardan 28-fevralǵa shekemgi aralıqta xalıqtı hám awıl xojalıǵın dizimge alıw ilajları ótkeriledi.

Bul process mámleketimizdiń sociallıq-ekonomikalıq rawajlanıwın strategiyalıq rejelestiriwde úlken áhmiyetke iye.
Ilaj eki basqıshta ámelge asırıladı.
Dáslepki basqıshı 15-31-yanvar kúnleri aralıǵında ótkerilip, puqaralar “census.stat.uz” portalı arqalı (fizikalıq shaxstıń jeke identifikaciya nomeri) járdeminde onlayn dizimnen ótedi. Usı basqıshta toplanǵan maǵlıwmatlar 3 kún ishinde analiz etiledi. Keyingi basqıshı 4-28-fevral kúnleri aralıǵında ótkerilip, onda “máhálle jetiligi” hám basqa da belsendiler úyme-úy júrip kerekli maǵlıwmatlardı toplaydı.
Bul arqalı – xalıq haqqında tolıq maǵlıwmat jıynaw, yaǵnıy shańaraqlardıń quramı, ondaǵı jaslardıń hám kekselerdiń úlesi, bilimlendiriw dárejesi, bántlik jaǵdayı hám migraciya processleri boyınsha maǵlıwmatlar toplanadı. Sonıń menen birge, awıl xojalıǵındaǵı jaǵday – jerden paydalanıw, sharwashılıq hám qusshılıq kórsetkishleri anıqlanadı.
Dizimge alıw ilajlarınıń qıs máwsimine mólsherlengeni de qolaylılıq jaratadı. Sebebi, bul dáwirde xalıq kóp háreketlenbeydi, awıl xojalıǵında máwsimlik jumıslar azayadı. Bul bolsa fermerler menen diyqanlar ushın da maǵlıwmat beriwde jeńillik jaratadı.
Eń áhmiyetlisi – dizimge alıw processi tek ǵana sanlardı jıynaw ushın emes, al puqaralardıń turmıs dárejesin jaqsılawǵa xızmet etetuǵın áhmiyetli qararlar qabıl etiw ushın tiykar boladı.
Házirgi waqıtta orınlarda dizimge alıwǵa tayarlıq jumısları qızǵın alıp barılmaqta. Máhállelerde, mekteplerde hám bilimlendiriw shólkemlerinde xalıqqa dizimge alıwdıń mazmun-mánisi hám maqsetleri haqqında túsinikler berilmekte.

Temirbay Ǵaniev,
Qaraqalpaqstan Respublikası statistika basqarmasınıń baslıǵı.
Qaraqalpaqstan xabar agentligi