Búgingi kúnde Májbúriy orınlaw byurosı Qaraqalpaqstan Respublikası basqarması hám onıń aymaqlıq bólimleri tárepinen mámleketimizdiń, puqaralardıń mápi jolında hújjetler orınlanıp, ámelde ádil sudlawdı támiyinlewge xızmet etpekte.

Sistemada jumıs alıp barıp atırǵan xızmetkerler sudlar hám basqa da uyımlardıń hújjetlerin orınlaw jumısı dawamında aliment, salıq, bank, mámleket hám puqaralardıń paydasına óndiriwlerdi, úyge kirgiziw, úyden shıǵarıw, balanı alıp beriw, bala menen kórisiw, jumısqa tiklew, miynet haqıların óndiriw hám usı sıyaqlı 2 mıń 500 den aslam múlklik emes túrdegi orınlaw hújjetlerin ámelge asırıp kelmekte.
Sonnan, 297 si bala menen kórisiw yamasa balanı alıp beriw, 58 i jumısqa tiklew menen baylanıslı bolsa, 1 619 ı nızamsız qurılmalardı buzıw hám minnetleme júklew, 187 i úyge kirgiziw hám úyden shıǵarıw, 369 ı dawanı támiyinlew sıyaqlılardı quraǵan.
– Sonı ayrıqsha atap ótiw kerek, jıldan-jılǵa atqarıw sistemasınıń jetilistirilip atırǵanı da kútilgen nátiyjeni bermekte. Sonıń ishinde, mámleketimiz basshısınıń 2024-jıl 3-yanvardaǵı “Sud hújjetleri hám basqa da uyımlardıń hújjetlerin orınlaw sistemasın reformalaw hám tarawdı sanlastırıw boyınsha qosımsha ilajlar haqqında”ǵı pármanı qabıl etilgeni MОBǵa  júklengen wazıypalardıń jáne de nátiyjeli orınlanıwına tiykar boldı, – deydi Májbúriy orınlaw byurosı Qaraqalpaqstan Respublikası basqarmasınıń baslıǵı Islam Arziev. – Bul hújjet penen tarawǵa bir qatar jańalıqlar engizilip atırǵanı nátiyjesinde, jumıs nátiyjeliligi artıp, barlıq baǵdarlarda óndiriwlerdiń salmaǵı arttı.
Alıp barılǵan májbúriy orınlaw háreketleri dawamında 1 761 orınlaw isi boyınsha juwmaqlawshı qarar qabıl etilgen bolsa, 830 ınıń ámelde orınlanıwı támiyinlendi.
Bul baǵdardaǵı jumıslar dawam ettirilmekte.

Qaraqalpaqstan xabar agentligi.