Pal jeti ǵáziyneniń biri deydi xalqımız. Haqıyqatında da shıpalı qásiyeti menen neshe ásirlerden berli belgili bolıp kiyatırǵan pal ónimin búgingi kúnde de xalqımız jaqsı kórip paydalanıp kelmekte.

Ásirese, sońǵı waqıtlarda xalqımız arasında pal hárreshilik penen shuǵıllanıwshı insanlardıń sanı artıp barmaqta. Solardıń biri ámiwdáryalı Haytbay Jumaniyazov.

Ámiwdárya rayonı Dúrmen awılında jasawshı Haytbay Jumaniyazov derlik 10 jıldan berli pal hárreshilik penen shuǵıllanıp kelmekte. Búgingi kúnde ol 100 pal hárre qutısına iye bolıp, bul tarawda jeterli tájiriybe hám tabısqa erisken.
Pal hárreshilik jumısı shańaraqlıq miynet tiykarında jolǵa qoyılǵan bolıp, hár bir processte shańaraq aǵzaları belsene qatnasadı. Miynet súyiwshilik, sabır-taqat hám durıs qatnas nátiyjesinde sapalı hám tábiyǵıy pal jetistirilmekte.
Bul jumıs tek ǵana turaqlı dáramat deregi emes, al shańaraq abadanlıǵınıń artıwına, jas áwladtıń miynetke bolǵan qızıǵıwshılıǵınıń qáliplesiwine de xızmet etpekte.
Xaytbay Jumaniyazovtıń baslaması awıllıq jerlerde isbilermenlikti rawajlandırıw, xalıqtıń bántligin támiyinlew hám sapalı ónimlerdi islep shıǵarıw jolındaǵı jarqın úlgilerden biri bolıp esaplanadı.
– Shańaraq aǵzalarımız benen birgelikte pal hárresin baǵıw hám olardan pal ónimin alıw menen shuǵıllanıp kelmektemiz. Pal hárreshilik kóp miynetti talap etkeni menen onnan mol dáramat tabıwǵa bolatuǵın talap. Házirgi waqıtta pal óniminiń kilogramın 70 mıńnan ishki bazarǵa shıǵarıp satıp atırmız. Mine usı shańaraqlıq kishi bizenstiń arqasında ul-qızlarımızdı oqıtıp, toylar berip, olardı úyli-jaylı ettik. Sonday-aq, úyimizge quyash panelin ornatıp, mashina aldıq. Bulardıń bári elimizde Prezidentimiz tárepinen isbilermenlerge jaratıp berip atırǵan imkaniyatlar hám miynetlerimizdiń nátiyjesi dep bilemen, – deydi Haytbay aǵa.
Házir qıs máwsimi bolǵanlıqtan pal hárresi uyqıda. Olardı erte báhárde qoldan azıqlandırıp, soń erik gúllegen máhálge tayarlaw ushın Haytbay aǵa tınıp-tınshımay barlıq tayarlıqlardı islep qoymaqta. Prezentleri de oǵan qol-qanat bolmaqta. Búgingi kúnde shańaraqta 100 pal hárre qutısı bar bolsa aldaǵı waqıtta 500 ge jetkeriwdi niyet etpekte. Álbette, pal hárresi sıyaqlı ózleri de tınım bilmeytuǵın ámiwdáryalı isbilermen shańaraq aǵzaları usı miynetleriniń arqasında zaman menen teńdey ayaq qosıp, jaqsı jasap kelmekte. Olardıń bul miynetsúyiwshiligi bárshege úlgi bolsa arzıydı.

G.Turdıshova, Qaraqalpaqstan xabar agentligi