Paytaxtımızda Isbilermenler háreketi – Ózbekstan Liberal-demokratiyalıq partiyası Qaraqalpaqstan Respublikası Keńesi Atqarıw komitetiniń gezektegi májilisi bolıp ótti.

Ilajda partiyanıń Qaraqalpaqstan Respublikası, qalalıq hám rayonlıq Keńesleri tárepinen 2025-jıl dawamında ámelge asırılǵan jumıslar dodalanıp, 2026-jılǵa mólsherlengen tiykarǵı wazıypalar belgilep alındı.
Atap ótilgenindey, partiya jumısınıń tiykarǵı maqseti – xalıq penen ashıqtan-ashıq sóylesiw, puqaralardı oylandırıp atırǵan mashqalalarǵa ámeliy sheshim tabıwdan ibarat. Usı kózqarastan, 2025-jıl Qaraqalpaqstanda partiya ushın nátiyjeli jıl boldı.
Búgingi kúnde partiyadan Oliy Majlis Nızamshılıq palatasında 3, Qaraqalpaqstan Respublikası Joqarǵı Keńesinde 22, qalalıq hám rayonlıq Keńeslerde 120 dan aslam deputat jumıs alıp barmaqta. Olar tek ǵana sessiyalarda qatnasıw emes, al óz saylaw okruglerinde xalıqtı qıynap atırǵan máselelerdi sheshiwge ayrıqsha itibar qaratpaqta.
2025-jıl dawamında orınlardaǵı mashqalalardı saplastırıw maqsetinde 400 den aslam deputatlıq sorawları jiberildi. Jergilikli Keńeslerdiń sessiyalarına 119, turaqlı komissiyalarǵa bolsa 48 usınıs hám baslamalar kirgizildi. Sonday-aq, Qaraqalpaqstan Respublikası Joqarǵı Keńesi hám jergilikli Keńeslerde juwapker basshılardıń esabatları tıńlanıp, orınlaw tártibi hám juwapkershilikti arttırıwǵa erisildi.
Xalıq penen islesiwde “Deputat máhállede,” “Bir deputat – júz hayalǵa járdemshi” sıyaqlı joybarlar úlken áhmiyetke iye boldı. Ásirese, hayal-qızlar hám jaslar menen islesiw, isbilermenlikti qollap-quwatlaw baǵdarında ámeliy nátiyjelerge erisildi. Mıńlaǵan puqaralardıń múrájatları ornında sheshildi.
Sonıń menen birge, partiya aǵzaları turaqlı keńeyip barmaqta. Bıyılǵı jılı 1850 den aslam jańa aǵza qabıl etilip, 12 jańa baslanǵısh partiya shólkeminiń jumısı jolǵa qoyıldı. Házirgi kúnde partiya aǵzalarınıń sanı 138 mıńnan arttı. Bul xalıqtıń partiyaǵa bolǵan isenimi artıp atırǵanınan derek beredi.
Májiliste 2026-jıl ushın belgilengen wazıypalarǵa da ayrıqsha itibar qaratıldı. Prezident Múrájatında belgilep berilgen tiykarǵı baǵdarlardan kelip shıqqan halda, deputatlardıń juwapkershiligin bunnan bılay da arttırıw, orınlarda ashıq-aydınlıq hám juwapkershilikti kúsheytiw, jaslar, hayal-qızlar hám isbilermenlerdi qollap-quwatlaw baǵdarındaǵı jumıslardı sistemalı dawam ettiriw belgilendi.
-2025-jıl partiyamız jumısında xalıq penen pikirlesiwdi jańa basqıshqa alıp shıqqan jıl boldı. Deputatlarımız hár bir múrájatqa ámeliy qatnas jasap, anıq nátiyjege eristi. 2026-jılda da tiykarǵı itibardı xalıqtıń máplerin qorǵaw, isbilermenlikti qollap-quwatlaw hám orınlarda ashıq-aydınlıqtı támiyinlewge qaratamız, – dedi Ózbekstan Liberal demokratiyalıq partiyası Qaraqalpaqstan Respublikası Keńesiniń Apparatı baslıǵı A.Aybergenov májilis juwamǵında óz pikirlerin bildirip.
Májilis juwmaǵında ótken 2025-jıl dawamında partiyanıń jumıslarında belsendilik kórsetken partiya xızmetkerleri xoshametlenip olarǵa minnetdarshılıq bildirilip, bayram sawǵaları tapsırıldı.
Ilaj partiyanıń aldaǵı iskerligin jáne de nátiyjeli shólkemlestiriw menen birge xalıqtıń isenimine múnásip xızmet etiwge qaratılǵan anıq wazıypalardıń belgileniwi menen juwmaqlandı.

Qaraqalpaqstan xabar agentligi