Berdaq atındaǵı Qaraqalpaq mámleketlik universitetinde shólkemlestiriw máselelerine baǵıshlanǵan májilis bolıp ótti.
Onda Qaraqalpaqstan Respublikası Ministrler Keńesi Baslıǵınıń orınbasarı Bayrambay Ótemuratov, Ózbekstan Respublikası Joqarı bilimlendiriw, ilim hám innovaciyalar ministriniń orınbasarı Wktam Salomov, professor-oqıtıwshılar hám juwapker xızmetkerler qatnastı.

Májiliste joqarı bilimlendiriw sistemasında alıp barılıp atırǵan reformalar, olardıń mazmun-mánisi, sonday-aq, mámleketimiz basshısı tárepinen joqarı bilimlendiriw mákemeleriniń aldına qoyılıp atırǵan áhmiyetli wazıypalar haqqında maǵlıwmatlar berilip, bilimlendiriwdiń sapasın arttırıw, ilimiy potencialdı bekkemlew, jaslardı zamanagóy bilim hám kásip-ónerlerge baǵdarlaw máseleleri kún tártibiniń tiykarǵı baǵdarları sıpatında atap ótildi.
Májiliste Ózbekstan Respublikası joqarı bilimlendiriw, ilim hám innovaciyalar ministriniń orınbasarı W.Salomov shıǵıp sóylep, Ózbekstan Respublikası Ministrler Kabinetiniń tiyisli qararına tiykarlanıp Berdaq atındaǵı Qaraqalpaq mámleketlik universitetiniń rektorı lawazımına Berdiyar Jollıbekov tayınlanǵanlıǵın rásmiy túrde járiyaladı.
Ministr orınbasarı jańa rektordı jámáátke tanıstırıp, onıń joqarı bilimlendiriw sistemasındaǵı tájiriybesi, basqarıw potencialı hám keleshekte universitettiń rawajlanıwı jolında ámelge asırıwı kútilip atırǵan tiykarǵı wazıypalarǵa ayrıqsha toqtap ótip, universitettiń aymaqlıq hám respublikalıq kólemdegi abırayı, ilim hám bilimlendiriw tarawındaǵı ornı jáne de bekkemlenetuǵınına isenim bildirdi.
Qaraqalpaqstan Respublikası Ministrler Keńesi Baslıǵınıń orınbasarı B.Ótemuratov ta óziniń shıǵıp sóylegen sózinde jańa rektordı juwapkershilikli lawazımǵa tayınlanǵanı menen qutlıqlap, universitet jámáátin alda turǵan áhmiyetli wazıypalardı birgelikte ámelge asırıwǵa shaqırdı. Ol bilimlendiriw mákemesin hár tárepleme rawajlandırıw, materiallıq-texnikalıq bazanı bekkemlew, bilimlendiriwdiń sapasın hám ilimiy-izertlewlerdiń nátiyjeliligin arttırıw máselelerine itibar qarattı.
Májilis dawamında universitet jámááti wákilleri tárepinen de pikir-usınıslar bildirildi.

Qaraqalpaqstan xabar agentligi