Bizge belgili, 2025-jıl 26-dekabr kúni mámleketimiz basshısı tárepinen Oliy Majlis hám Ózbekstan xalqına gezektegi Múrájat usınıldı. Bul Múrájat mámleketimiz rawajlanıwınıń jańa basqıshın belgilep bergen, strategiyalıq áhmiyetke iye tiykarǵı programmalıq hújjet sıpatında keń jámiyetshiliktiń itibarında boldı. Onda mámleketti jáne de turaqlı hám izbe-iz rawajlandırıwǵa qaratılǵan tiykarǵı wazıypalar, anıq maqset hám baǵdarlar belgilep berildi.

Múrájatta Prezidentimiz tárepinen mámleketlik hám jámiyetlik turmıstıń barlıq tarawlarına ayrıqsha toqtap ótildi. Ekonomikanı turaqlı rawajlandırıw, isbilermenlikti qollap-quwatlaw, jańa jumıs orınların jaratıw, xalıqtıń dáramatların arttırıw máselelerine keń itibar qaratıldı. Sonıń menen birge, bilimlendiriw, densawlıqtı saqlaw, ilim, sanlastırıw hám ekologiyalıq turaqlılıq sıyaqlı sociallıq áhmiyetke iye baǵdarlardaǵı bar mashqalalar tallanıp, olardıń anıq sheshimleri belgilep berildi.
Ásirese, Múrájatta sociallıq ádillikti támiyinlew, xalıqtıń turmıs dárejesin jaqsılaw hám insan máplerin eń tiykarǵı wazıypa sıpatında belgilewge ayrıqsha itibar qaratıldı. Mámleketlik siyasattıń orayında insan, onıń huqıqları menen erkinlikleri, qáwipsizlik hám abadan turmısınıń turaqlı bolıwı jáne bir márte qatań atap ótildi. Bul bolsa mámleketimizde alıp barılıp atırǵan reformalar xalıqshıl, ashıq-aydın hám nátiyjege qaratılǵanın jáne bir márte tastıyıqladı.
Ózbekstan Respublikası Ayrıqsha jaǵdaylar ministrligi Akademiyasınıń baslıǵı, yuridikalıq ilimler doktorı, professor, polkovnik Muzaffarjon Mamasiddiqov ÓzAnıń xabarshısı menen sáwbette usı Múrájat boyınsha óz pikir-usınısların bildirdi.
– Bul Múrájat Jańa Ózbekstandı qurıw hám onı izbe-iz rawajlandırıw jolında strategiyalıq áhmiyettegi programmalıq hújjet bolıp esaplanadı. Ásirese, onda ilimdi rawajlandırıw, innovaciyalıq ideyalar hám texnologiyalardı turmısqa engiziw, sonday-aq, mámlekettiń intellektuallıq potencialın arttırıw máseleleri tiykarǵı wazıypa sıpatında belgilep berilgeni ayrıqsha áhmiyetke iye boladı.
Zamanagóy qáwip-qáterler hám globallıq klimat ózgerisleri sharayatında ayrıqsha jaǵdaylar tarawında joqarı bilimge, tereń tallaw qábiletine iye qánigelerdi tayarlaw úlken áhmiyetke iye. Usı mániste, Múrájatta belgilep berilgen wazıypalar joqarı áskeriy bilimlendiriw mákemeleriniń aldına da jańa, juwapkershilikli wazıypalardı qoyadı.
Bul Múrájat joqarı bilimlendiriw mákemeleri, atap aytqanda, Ayrıqsha jaǵdaylar ministrligi Akademiyasınıń jumısı ushın da áhmiyetli strategiyalıq baǵdarlardı belgilep berdi. Barlıq baǵdarlarda, sonıń ishinde, ayrıqsha jaǵdaylardıń aldın alıw hám saplastırıw baǵdarında da ilimiy-izertlew jumıslarınıń sapasın arttırıw, zamanagóy texnologiyalardı engiziw jáne olardı milliy sharayatqa beyimlestiriw áhmiyetli wazıypa etip belgilendi. Bul bolsa ilimiy qollanbalardı tek teoriyalıq dárejede emes, al ámeliy nátiyjelerge baǵdarlaw zárúrligin keltirip shıǵaradı. Sonıń menen birge, innovaciyalıq texnika hám aldınǵı qáwipsizlik sistemaların islep shıǵıw, olardı ámeliyatqa engiziw arqalı ayrıqsha jaǵdaylar uyımları jumısınıń nátiyjeliligin arttırıw hám zamanagóy ilimiy-texnikalıq sheshimlerdi jaratıw imkaniyatı keńeyedi.
Joqarı bilimlendiriw hám ilimiy-izertlew mákemeleri arasındaǵı óz-ara birge islesiwdi jáne de bekkemlew, olardıń jumısın óz-ara baylanıslı halda rawajlandırıw búgingi kúnde áhmiyetli wazıypalardan biri bolıp esaplanadı. Ásirese, jas qánigelerdi zamanagóy bilim hám ámeliy kónlikpelerge iye bolǵan, erkin pikirley alatuǵın, básekige shıdamlı kadrlar etip tayarlawda bunday birge islesiwdiń áhmiyeti úlken. Jas kadrlardıń ilimiy izleniwlerge keńnen tartılıwı, olardıń izertlew alıp barıw qábiletin rawajlandırıw hám ilimiy potencialın arttırıw usı processtiń áhmiyetli hám úzliksiz strukturalıq bólegi bolıp esaplanadı. Joqarı bilimlendiriw mákemeleri hám ilimiy-izertlew orayları arasında qospa joybarlardı ámelge asırıw, ilimiy konferenciyalar, seminar hám tájiriybe almasıwlardı jolǵa qoyıw arqalı jas ilimpazlardı qollap-quwatlaw imkaniyatları jáne de keńeyedi. Nátiyjede, bilimlendiriw, ilim hám ámeliyat arasında bekkem baylanıs qáliplesip, mámlekettiń ilimiy-intellektuallıq potencialın arttırıwǵa xızmet etetuǵın nátiyjeli sistema jaratıladı.
Múrájatta ilimiy kadrlardı hár tárepleme qollap-quwatlaw, olardı xoshametlew, kásiplik bilim hám mamanlıǵın turaqlı túrde arttırıp barıw, sonday-aq, ilimiy jumısqa zamanagóy izertlew metodları hám innovaciyalıq qatnaslardı engiziw máselelerine ayrıqsha itibar qaratıldı. Bunday tiykarǵı wazıypalardıń belgileniwi Ayrıqsha jaǵdaylar ministrligi Akademiyasında ilimiy ortalıqtı túp-tiykarınan jaqsılaw, izertlewlerdiń sapasın jańa basqıshqa alıp shıǵıwǵa xızmet etedi.
Ásirese, ilimiy potencialǵa iye professor-oqıtıwshılar hám jas izertlewshiler ushın keń imkaniyatlar jaratılıwı, olardıń baslaması hám ilimiy ideyaların qollap-quwatlaw ilimiy mekteplerdi rawajlandırıwǵa bekkem tiykar jaratadı. Nátiyjede ayrıqsha jaǵdaylardıń aldın alıw hám saplastırıw tarawında júzege kelip atırǵan mashqalalardı tereń tallaw, qáwip-qáterlerdi aldınnan prognozlaw hám olarǵa ilimiy-texnikalıq tiykarlanǵan operativ sheshimler islep shıǵıw imkaniyatları jáne de keńeyedi. Bul bolsa, óz gezeginde, ayrıqsha jaǵdaylardıń aldın alıwdıń nátiyjeli sistemasın qáliplestiriw, xalıqtıń qáwipsizligin támiyinlew hám mámleket máplerin qorǵawda ilimiy qatnastıń rolin jáne de arttırıwǵa xızmet etedi.
Juwmaqlap aytqanda, Prezidentimizdiń Oliy Majlis hám Ózbekstan xalqına jollaǵan Múrájatı Ayrıqsha jaǵdaylar ministrligi Akademiyasınıń aldına ilim hám innovaciyalardı rawajlandırıw, ilimiy izertlewlerdi ámeliyat penen úzliksiz baylanıstırıw baǵdarında anıq, puqta oylanǵan hám joqarı juwapkershilikti talap etetuǵın wazıypalardı qoyadı. Bul wazıypalar Akademiyanıń jumısın zaman talapları tiykarında jetilistiriw, ilimiy potencialdı bunnan bılay da arttırıw jáne zamanagóy bilim hám texnologiyalarǵa súyengen qánigeler tayarlawǵa xızmet etedi.
Belgilengen tiykarǵı baǵdarlardıń izbe-iz hám nátiyjeli ámelge asırılıwı elimizde ayrıqsha jaǵdaylardı aldınnan ilimiy prognozlaw, olardıń aldın alıw, júzege kelgen jaǵdaylarda bolsa jedel hám nátiyjeli saplastırıw sistemasın jańa basqıshqa alıp shıǵadı. Sonıń menen birge, xalıqtıń ómiri hám densawlıǵın qorǵaw, yuridikalıq hám fizikalıq shaxslardıń múlkin hár qıylı apatshılıqlardan saqlaw, strategiyalıq obektlerdiń qáwipsizligin kúsheytiwde ilimiy tiykarlanǵan qatnaslar jáne de bekkemlenedi.
Usı tárizde, Ayrıqsha jaǵdaylar ministrligi Akademiyası Jańa Ózbekstandı ilimge súyengen, básekige shıdamlı hám innovaciyalıq mámleket sıpatında qáliplestiriwde áhmiyetli orın iyeleytuǵın tayanısh joqarı bilimlendiriw mákemesine aylanıp baradı. Akademiyada alıp barılıp atırǵan ilimiy izertlewler, innovaciyalıq qollanbalar hám aldınǵı tájiriybeler tek ǵana tarawdıń rawajlanıwına emes, al mámlekettiń qáwipsizligin támiyinlewge de salmaqlı úles qosadı.

Gulnoza Boboeva jazıp aldı. ÓzA