Múnásibet

2025-jıl 26-dekabr kúni Ózbekstan Respublikası Prezidenti tárepinen Oliy Majlis hám xalqımızǵa jollaǵan múrájat mámleket rawajlanıwınıń jańa basqıshın belgilep beretuǵın tiykarǵı siyasiy hám sociallıq hújjet sıpatında ayrıqsha áhmiyetke iye boldı. Bul múrájat ótken dáwirdiń nátiyjelerine juwmaq shıǵarıw menen birge, kelesi jıl hám uzaq perspektiva ushın anıq tiykarǵı wazıypalardı belgilep berdi.

Prezident Múrájatında bilimlendiriw sisteması jámiyetlik hám ekonomikalıq rawajlanıwdıń sheshiwshi faktorı sıpatında tán alındı. Bilimlendiriwdiń sapası tikkeley insan kapitalınıń rawajlanıwı, miynet bazarınıń talaplarına sáykes kadrlar tayarlaw hám innovaciyalıq ekonomika qurıwǵa baylanıslı ekeni atap ótildi. Bunday kózqaras bilimlendiriwdi tek bilim beriw quralı emes, al strategiyalıq rawajlanıwdıń resursı sıpatında kóriw zárúrligin ańlatadı. Múrájatta ulıwma orta, kásip-óner hám joqarı bilimlendiriw sistemaların modernizaciyalaw, muǵallimlerdiń kásiplik abırayın arttırıw, bilimlendiriw procesine sanlı texnologiyalardı keńnen engiziw máseleleri tiykarǵı wazıypa sıpatında belgilendi. Bul bolsa bilimlendiriw tarawında sapa hám nátiyjelilikti arttırıwǵa qaratılǵan áhmiyetli qádem bolıp esaplanadı.
Múrájatta jasalma intellekt hám sanlı texnologiyalar máselelerine ayrıqsha itibar qaratılıwı zamanagóy globallıq tendenciyalarǵa sáykes keledi. Prezident jasalma intellektti ekonomika, bilimlendiriw, densawlıqtı saqlaw hám mámleketlik basqarıw tarawlarında keńnen engiziw zárúrligin atap ótti. Bul bolsa Ózbekstannıń sanlı transformaciya procesinde belsene qatnasıw tilegin kórsetedi. Bilimlendiriw tarawında jasalma intellektten paydalanıw individual oqıtıw, bilimlerdi bahalaw, bilimlendiriwdiń sapasın monitoring etiw imkaniyatların keńeytedi. Sonıń menen birge, Prezident tárepinen jaslardı jasalma intellekt, programmalastırıw hám sanlı sawatlılıqqa úyretiw keleshektegi básekige shıdamlılıqtı támiyinlewdiń áhmiyetli shárti sıpatında atap ótildi. Múrájattaǵı bul ideyalar sonı kórsetedi, jasalma intellekt tek ǵana texnologiyalıq qural emes, al sociallıq-ekonomikalıq rawajlanıwdıń strategiyalıq faktorı sıpatında qaralmaqta. Múrájatta, sonday-aq, sociallıq qorǵaw, densawlıqtı saqlaw hám xalıqtıń turmıs dárejesi máseleleri de shette qalmadı. Medicinada sanlı texnologiyalar hám jasalma intellektten paydalanıw arqalı xızmetlerdiń sapasın arttırıw, xalıqqa qolaylı hám operativ xızmet kórsetiw imkaniyatları keńeytiletuǵını atap ótildi. Bul bolsa salamat jámiyet qurıw jolındaǵı áhmiyetli faktor bolıp esaplanadı. Sırtqı siyasatqa baylanıslı pikirlerde bolsa Ózbekstannıń ashıq, pragmatikalıq hám birge islesiwge tiykarlanǵan siyasatı dawam ettiriletuǵını atap ótildi. Bilimlendiriw, ilim hám jasalma intellekt tarawlarında xalıqaralıq birge islesiwdi keńeytiw, aldınǵı tájiriybelerdi engiziw mámlekettiń globallıq básekige shıdamlılıǵın arttırıwǵa xızmet etetuǵını atap ótildi. 2025-jıl 26-dekabr kúni Ózbekstan Respublikası Prezidenti tárepinen jollanǵan múrájatta alǵa qoyılǵan pikirlerden kelip shıǵıp sonı aytıw kerek, jasalma intellekt hám sanlı texnologiyalardı hár qıylı tarawlarǵa, sonıń ishinde, sport sistemasına engiziw máseleleri zamanagóy rawajlanıwdıń áhmiyetli baǵdarı sıpatında tán alındı. Sport tarawında jasalma intellektten paydalanıw tek ǵana nátiyjelilikti arttırıw emes, al salamat áwladtı tárbiyalaw, ǵalabalıq sporttı rawajlandırıw hám professional sportshılardı tayarlaw sistemasın modernizaciyalawǵa xızmet etedi.
Bárinen burın, jasalma intellekt sportshılardı tayarlaw procesinde individual qatnastı támiyinlew imkaniyatın beredi. JI tiykarındaǵı tallaw sistemaları sportshılardıń fizikalıq kórsetkishleri, shınıǵıw júklemeleri, tikleniw procesi hám jarıs nátiyjelerin turaqlı monitoring etiw arqalı hár bir sportshı ushın jeke tayarlıq baǵdarlamaların islep shıǵıwǵa xızmet etedi. Bul bolsa jaraqatlar qáwpin azaytıp, sport nátiyjeleriniń turaqlı ósiwin támiyinleydi.
Prezident Múrájatında alǵa qoyılǵan insan kapitalın rawajlandırıw ideyası sport tarawında jasalma intellektten paydalanıw arqalı ámeliy mazmunǵa iye boladı. JI járdeminde jas sportshılardı erte anıqlaw, olardıń qábiletlerin boljaw hám maqsetli tayarlaw mexanizmleri jaratıladı. Bul bolsa sport rezervin qáliplestiriwde ilimiy tiykarlanǵan qatnastı kúsheytedi.
Sonday-aq, jasalma intellekt sport medicinasında da úlken áhmiyetke iye. JI tiykarındaǵı diagnostika hám tallaw sistemaları sportshılardıń densawlıǵın qadaǵalaw, jaraqatlardıń aldın alıw hám reabilitaciya processlerin nátiyjeli shólkemlestiriw imkaniyatın beredi. Bul Prezident Múrájatında atap ótilgen salamat turmıs tárizin úgit-násiyatlaw hám medicinalıq xızmetlerdiń sapasın arttırıw ideyaları menen úzliksiz baylanıslı bolıp esaplanadı. Sport basqarıwı hám infrastrukturasında da jasalma intellektten paydalanıw imkaniyatları keń. Jarıslardı shólkemlestiriw, sport imaratlarınan paydalanıw nátiyjeliligin arttırıw, sport mektepleri hám klublarınıń jumısın tallawda JI tiykarındaǵı sistemalar basqarıw qararlarınıń sapasın arttıradı. Bul bolsa mámleketlik sport siyasatında ashıq-aydınlıq hám nátiyjelilikti támiyinlewge xızmet etedi.
Ǵalabalıq sporttı rawajlandırıw kózqarasınan, jasalma intellekt xalıqtıń fizikalıq belsendiligin arttırıwǵa xızmet etetuǵın sanlı platformalar hám mobil qosımshalar arqalı salamat turmıs tárizin ǵalaba en jaydırıw imkaniyatın beredi. JI tiykarında islep shıǵılǵan usınıslar puqaralardıń jasına, densawlıǵına hám fizikalıq tayarlıǵına sáykes shınıǵıwlardı tańlawǵa járdem beredi.
Prezident Múrájatında bilimlendiriw hám sanlı kompetenciyalardı rawajlandırıwǵa ayrıqsha itibar qaratılǵanın esapqa alsaq, sport tarawında jasalma intellekt penen isley alatuǵın qánigelerdi tayarlaw máselesi de ayrıqsha áhmiyetke iye. Trenerler, sport shıpakerleri hám basqarıwshılardıń sanlı sawatlılıǵın arttırıw sport sistemasınıń básekige shıdamlılıǵın kúsheytedi. Prezident Múrájatında alǵa qoyılǵan jasalma intellektke baylanıslı ideyalar sport tarawında innovaciyalıq rawajlanıw, salamat áwladtı tárbiyalaw hám joqarı sport nátiyjelerine erisiwdiń áhmiyetli faktorına aylanbaqta. Jasalma intellektti sport sistemasına aqılǵa uǵras hám ilimiy tiykarda engiziw Ózbekstan sportınıń xalıqaralıq maydandaǵı básekige shıdamlılıǵın arttırıwǵa xızmet etedi.
Juwmaqlap aytqanda, 2025-jıl 26-dekabr Prezident Múrájatı mámleketlik basqarıw, ekonomika, sociallıq taraw, bilimlendiriw hám jasalma intellekt baǵdarların óz-ara úzliksiz baylanıslı halda kórip shıqqan kompleksli hújjet bolıp esaplanadı. Bul múrájat jámiyetti jáne de rawajlandırıwǵa qaratılǵan anıq jol kartası bolıp, onıń tabısı bilimlendiriwdiń sapasın arttırıw, sanlı hám jasalma intellekt texnologiyaların aqılǵa uǵras engiziw jáne barlıq dárejedegi orınlaw tártibi hám puqaralardıń belsene qatnasıwına tikkeley baylanıslı.

Nodir Ǵafforov, Shuxrat Arslonov, ÓzMDTSUdıń professorları