Ózbekstanda elektron esap-fakturalar (EEF) arqalı ámelge asırılıp atırǵan operaciyalar ústinen salıq qadaǵalawınıń jańa mexanizmi engizilmekte.

Atap aytqanda, Ministrler Kabinetiniń 2025-jıl 26-dekabrde qabıl etilgen 830-sanlı qararı menen “Elektron esap-fakturalardıń qáwip dárejesin anıqlaw hám olarda kórsetilgen operaciyalar boyınsha qosımsha qun salıǵın tólew tártibi haqqında”ǵı reje tastıyıqlandı.
Usı Reje elektron esap-fakturalardı tovarlar (xızmetler)dı jetkerip beriwdiń birden-bir shınjırı sheńberinde tallaw, olardıń qáwip dárejesin bahalaw hám tiyisli kategoriyalarǵa ajıratıw tártibin belgileydi.
Sonday-aq, EFlerdiń qáwip dárejesine qarap qosımsha qun salıǵın (QQS) tólew hám esapqa alıwdıń ózine tán ózgeshelikleri anıq belgilep berildi.
Rejege muwapıq, elektron esap-fakturalardı bahalaw arnawlı málimleme sisteması arqalı avtomat túrde ámelge asırıladı. Bul sistema arqalı joqarı qáwip dárejesine iye dep tabılǵan EEFlerdiń úlesi esabat dáwirinde QQS tólewshisi tárepinen rásmiylestirilgen jámi EEFler sanınıń 10 procentinen artpawı kerek.
EEFlerdiń qáwip dárejesin anıqlaw ólshemleri Ózbekstan Respublikası Salıq komiteti tárepinen belgilenedi. Usı kriteriyalar tiykarında elektron esap-fakturalar tómendegi eki kategoriyaǵa ajıratıladı – qáwiplilik dárejesi tómen bolǵan EEFler, qáwiplilik dárejesi joqarı bolǵan EEFler.
Málimleme sistemasında hár bir norma boyınsha belgilengen ballar jıyındısı tiykarında EEFlerdiń ulıwma qáwip dárejesi esaplanadı hám soǵan bola klassifikaciyalanadı. Salıq komiteti bolsa qáwip dárejesin esapqa alǵan halda elektron esap-fakturalardıń oraylasqan elektron reestrin júrgizedi.
Bul tártip salıq hákimshiligin jetilistiriw, QQS boyınsha qáwipli operaciyalardı erte anıqlaw hám tarawdıń ashıq-aydınlıǵın támiyinlewge qaratılǵan bolıp, biznes subektleri ushın da anıq hám sistemalı qaǵıydalardı belgilep beredi.

Sh.Mamaturopova, ÓzA