Házirgi waqıt awıl xojalıǵında 2026-jıldıń ónimi ushın egilgen ǵálleniń zúráátli bolıwı ushın onı tárbiyalaw jumıslarınıń áhmiyetli mapazı bolıp esaplanadı.

Qanlıkól rayonındaǵı Arzımbetqum awıl puqaralar jıyını aymaǵında jaylasqan “Besqala-2” fermer xojalıǵınıń ǵálle maydanlarında ǵálle jetistiriwde zúráátlilikti arttırıw máselelerine baǵıshlanǵan kórgizbeli seminar bolıp ótti.
Onda, Qaraqalpaqstan Respublikası Ministrler Keńesiniń Awıl hám suw xojalıǵı máseleleri boyınsha sekretariatınıń baslıǵı F.Nurmuxammedov, “Dán hám salı” ilimiy-óndirislik birlespesiniń direktorı D.Utambetov, “Ózagrolizing” akcionerlik jámiyeti Qaraqalpaqstan Respublikası filialınıń direktorı M.Djumaniyazov, Qanlıkól rayonı hákiminiń awıl hám suw xojalıǵı máseleleri boyınsha orınbasarı B.Tóreshov, klaster wákilleri, awıl xojalıǵı tarawı boyınsha mákeme, shólkem hám fermer xojalıqlarınıń basshıları qatnastı.
Seminar dawamında agrotexnikalıq ilajlardıń belgilengen tártipte orınlanıwı, ǵálle jetistiriwdiń nátiyjeliligin jáne de arttırıw, suw resurslarınan aqılǵa uǵras paydalanıw, ǵálleni mineral hám organikalıq tóginler menen azıqlandırıw hám keleshekte ámelge asırılatuǵın tiykarǵı wazıypalar boyınsha anıq ilajlar belgilep alındı.
Seminar dawamında qatnasıwshılar qánigelerden ózlerin qızıqtırǵan sorawlarǵa juwap aldı.
Bul baǵdardaǵı seminarlar basqa da rayonlarda dawam etpekte.

Qaraqalpaqstan xabar agentligi