Mine kózdi ashıp jumǵansha 2025-jıl menen xoshlaspaqtamız. Ótip baratırǵan hár bir kúnimiz xalqımızdı jańa jılǵa qaray baslamaqta. Artta qalıp atırǵan jıl da barlıq tarawlar sıyaqlı, bilimlendiriw, sport, mádeniyat hám kórkem óner tarawlarında da úlken jetiskenlikler qolǵa kirgizildi.

Bizler taraw pidayıları, jaslar hám sportshılarımız tárepinen qolǵa kirgizilgen tabıslarǵa qısqasha sholıw jasaymız.
2025-jıldıń yanvar ayında Kolumbiyanıń Bogota qalasında qılıshlasıw sportınıń sablya túri boyınsha 20 jasqa shekemgi sportshılar arasında jáhán kubogi jarısları bolıp ótti hám onda jerlesimiz Musa Aymuratov jarıs jeńimpazına aylandı. Al, usı jarısqa qatnasqan jáne bir jerlesimiz Alpamıs Oraqbaev qola medalın qolǵa kirgizdi.
Sonday-aq, bul chempionatta Ózbekstan saylandı komandası aǵzaları komandalıq bellesiwlerde de tabıslı qatnasıp, altın medaldı qolǵa kirgiziwge miyasar boldı.
Atap aytqanda, Nargiza Jaqsıbaeva, Ayakóz Jumamuratova, Samira Shokirovadan ibarat qızlarımız finalda meksikalılardı 45:20, Sardor Abdukarimbekov, Musa Aymuratov hám Alpamıs Oraqbaev quramındaǵı jigitlerimiz de maydan iyelerin 45:28 esabında jeńip shıǵıwǵa eristi hám jáhán kuboginiń altın medalları menen sıylıqlandı.

Adilbay Orazov,
Qaraqalpaqstan xabar agentligi sholıwshısı