Jańa jıl bayramı aldınan rayondaǵı bir neshe bilimlendiriw shólkemleri imaratlarınıń saltanatlı ashılıw máresimleri bolıp ótti.

Tórtkúl rayonı “Mashal” mákan puqaralar jıyını aymaǵındaǵı 42-sanlı mekteptiń de ashılıwı mektep oqıwshıları ushın umıtılmas waqıya boldı, desek asıra aytqan bolmaymız. Bul mektepte 330 orınlıq qosımsha jańa oqıw imaratınıń saltanatlı ashılıw máresimi bolıp ótti.
Jańa oqıw imaratın qurıw ushın 4,337 milliard sum qarjı ajıratılǵan bolıp, qurılıs jumısları “MA To‘rtko‘l stroy” JShJ tárepinen joqarı sapada juwmaǵına jetkerildi. Endi mektep oqıwshıları jáne de zamanagóy hám qolaylı sharayatlarda bilim aladı.
Sonday-aq, rayondaǵı “Ullıbaǵ” awıl puqaralar jıyını aymaǵında jańa, kórkem 74-sanlı mektep óz jumısın basladı. Bul mektep 330 orınǵa mólsherlengen jańa oqıw imaratı hám zamanagóy sport zalına iye bolıp, bul imarattıń qurılısına 11 milliard 681 million 205 mıń 173 sum qarjı ajıratılıp, “Xivaneftgaz qurilish ta’mirlash” JShJ tárepinen ámelge asırıldı.
Saltanatlı ashılıw máresiminde rayon hákimi I.Xudaybergenov qatnasıp, jıynalǵanlardı usı quwanıshlı waqıya – jańa imaratlardıń ashılıwı hám kirip kiyatırǵan Jańa jıl bayramı menen qızǵın qutlıqladı.

Qaraqalpaqstan xabar agentligi