Qanlıkól rayonı turǵınları da jańa 2026-jılǵa baǵıshlanǵan bayram ilajlarında kóterińki ruwxta qatnaspaqta.

Usı múnásibet penen rayondaǵı “Jaslar seyili” orayı balalar, keń jámiyetshilik wákilleri, miymanlar menen tolıp, bayram seyili ótkerildi. Respublikamızǵa belgili kórkem óner sheberleriniń qatnasıwında koncert baǵdarlamaları shólkemlestirildi.
Bayram ilajında rayon hákimi B.Sultanov jıynalǵanlardı jańa jıl menen qızǵın qutlıqlap, rayon xalıq xojalıǵı tarawlarında 2025-jılda erisilgen jetiskenliklerge keń túrde toqtap ótti.
Shınında da, Jańa jıl bayramı hár bir insannıń ómirinde jańa rejeler, jańa baslamalar, jańa ideyalar bosaǵası, artta qalıp atırǵan jıldı juwmaqlaw, jıl dawamında ámelge asırılǵan hám ámelge asıra almaǵan jumıslar, qolǵa kirgizilgen tabıslar hám jol qoyılǵan kemshiliklerdi ulıwmalastırıp, juwmaq shıǵaratuǵın, keleshek rejelerin belgileytuǵın bayram ekenligi menen ajıralıp turadı.
Rayondaǵı bayramǵa baǵıshlanǵan ilajlar balalar baqshalarında, mekteplerde hám miynet jámáátlerinde de ótkerilip, balalarǵa sawǵa tarqatılıp, koncert baǵdarlamaları, ertek qaharmanlarınıń shıǵıwları shólkemlestirildi.
Jańa jıl bayramı elimiz boylap kóterińkilik ruwxında dawam etpekte.

Á.Jiyemuratov,
Qaraqalpaqstan xabar agentligi