Aldın xabar berilgenindey, bajıxana xızmetkerleri tárepinen Ózbekstan Respublikası Prezidentiniń 2025-jıl 17-dekabrdegi “Bajıxana hákimshiligi hám sırtqı sawda tártiplerin jáne de ápiwayılastırıw hám nátiyjeliligin arttırıw ilajları haqqında”ǵı pármanınıń mazmun-mánisin isbilermenlik subektlerine túsindiriw jumısları dawam etpekte.

Sırt elli isbilermenlik subektlerine de túsindiriw jumısların alıp barıw maqsetinde «CHINA RAILWAY 20 BUREAU GROUP CORPORATION» kárxanasınıń wákilleri menen dógerek sáwbeti ótkerildi.
Bul kárxana tárepinen házirgi kúnde aymaqta dárya qurılısı jumısları alıp barılmaqta. Kárxana wákillerine pármanda belgilengen bajıxana hákimshiligin ápiwayılastırıw, sırtqı sawda tártip-qaǵıydaların jeńillestiriw hám isbilermenlerge jaratılıp atırǵan qolaylıqlar boyınsha tolıq maǵlıwmatlar berildi.
Atap aytqanda, 2026-jıl 1-marttan baslap tovarlardı shegara ótkeriw punktlerine jetip kelgenge shekem dáslepki deklaraciyalaw arqalı “erkin aylanısqa shıǵarıw” bajıxana rejimine jaylastırıwda bajıxana rásmiylestiriwi ushın óndiriletuǵın bajıxana tóleminiń muǵdarı 20 procentke azaytılıwı hám bajıxana tólemlerin bólip-bólip (keshiktirip) tólewde 14 kúnge shekem procentler esaplanbawı belgilengeni atap ótildi.
Sonday-aq, 2026-jıl 1-maydan baslap tovarlardı dáwirlik deklaraciya arqalı rásmiylestiriwde bajıxana tólemlerin tovarlar respublika aymaǵına kirip kelgende hár bir partiya ushın óz aldına tólew imkaniyatı jaratılatuǵını haqqında da tolıq maǵlıwmat berildi.
Ushırasıw dawamında ámeliy máseleler dodalanıp, usı qarardaǵı jeńillikler menen abzallıqlar túsindirilip, keleshekte ámelge asırılatuǵın joybarlar haqqında dógerek sáwbeti de ótkerildi.
Qatnasıwshılar ózlerin qızıqtırǵan sorawlarǵa juwap aldı.

A.Jiyemuratov,
Qaraqalpaqstan xabar agentligi