Jańa jıl bayramı qarsańında Qaraqalpaqstan Respublikası Bajıxana basqarması xızmetkerleriniń shańaraq aǵzaları hám perzentleri ushın Kásiplik awqam komiteti tárepinen Qaraqalpaq mámleketlik jas tamashagóyler teatrında mádeniy ilaj shólkemlestirildi.

Bayram baǵdarlaması sheńberinde balalar ushın saxnalastırılǵan “Jumanji” atlı ráńbáreń hám qızıqlı spektakl qoyıp berildi. Teatr saxnasında janlanǵan ertek waqıyaları, kewilli qaharmanlar hám nama-qosıqlar hám sulıw saxna bezewleri balalardıń kewlinde sheksiz quwanısh oyattı.
Bul ilaj tek ǵana balalar ushın haqıyqıy bayram sawǵasına aylanıp qoymastan, al xızmetkerler hám olardıń shańaraq aǵzaları ushın da qızǵın ortalıqta birlesiw, quwanıshtı birge seziw imkaniyatın jarattı. Zaldaǵı balalardıń pák kúlkisi, ata-analardıń júzindegi kewilli kúlki ilajdıń tiykarǵı maqsetin jáne de ayqın kórsetti.

Qaraqalpaqstan xabar agentligi