Qońırat rayonında Ózbekstan Xalıq demokratiyalıq partiyası Qaraqalpaqstan Respublikası Keńesi tárepinen partiya «Jaslar qanatı» aǵzaları, joqarı oqıw orınlarınıń student jasları arasında «Siyasattaǵı jaslar» intellektuallıq jarısı ótkerildi.

Ilajdı Ózbekstan XDP Qaraqalpaqstan Respublikası Keńesi baslıǵınıń orınbasarı M.Esengeldiev ashıp berdi hám qatnasıwshılardı qutlıqladı.
– Ilajdıń tiykarǵı maqseti – jaslardıń siyasiy bilimlerin arttırıwdan, olardıń jámiyetlik turmısta, siyasiy processlerde belsene qatnasıwın támiyinlewden, qábiletli hám intaker jaslardı anıqlawdan ibarat, – deydi Ózbekstan Xalıq demokratiyalıq partiyası Qaraqalpaqstan Respublikalıq Keńesi Partiya ideyaların úgit-násiyatlaw hám málimleme siyasatı bólimi baslıǵı Nurlan Kıshanov. -Intellektuallıq jarıs qatnasıwshıları “Tez soraw-juwap” hám “Siyasiy tez juwap” shártlerinde óz bilimlerin sınaqtan ótkerdi.
Qızǵın bellesiwge tolı bolǵan jarıs juwmaǵında “Grand” komandası birinshi orındı iyelewge miyasar boldı.
Sıylı ekinshi hám úshinshi orınlar “Mádeniyat” hám “Parlament” komandalarına nesip etti.
Jeńimpazlar partiyanıń Qaraqalpaqstan Respublikası Keńesi tárepinen tayarlanǵan diplom hám estelik sawǵaları menen sıylıqlandı.

Adilbay Orazov,
Qaraqalpaqstan xabar agentligi sholıwshısı