Elimizde hár bir bayramdı jaqsı keypiyatta kútip alıw maqsetinde, aymaqlarda jańa sociallıq hám óndiris obektlerin iske qosıw dástúrge aylanǵan. Sol aytqanınday házirgi kúnleri respublikamızdıń barlıq aymaqlarında jańalanıwlardıń ayqın kórinisi bolǵan bunday jańa obektler qurıp pitkerilip, xalqımız iygiligi ushın paydalanıwǵa tapsırılmaqta.

Usınday úlken jańalıqlardıń biri Kegeyli rayonında da júz berip, onda Kadastr agentligi hám Mámleketlik kadastrları palatası Qaraqalpaqstan Respublikası rayonlıq bólimi hám filialınıń jańa imaratınıń ashılıw máresimi bolıp ótti.
Onda Kegeyli rayonı hákimi A.Kamalov, Qaraqalpaqstan Respublikasi Joqarǵı Keńesiniń komitet baslıǵı B.Seytnazarov, Kadastr agentligi Qaraqalpaqstan Respublikası basqarması baslıǵı I.Tleuov, hám aymaq nuranıyları shıǵıp sóylep, sońǵı waqıtları Prezidentimiz hám respublika húkimeti tárepinen kadastr tarawına qaratılıp atırǵan atırǵan ayrıqsha itibar hám nızamshılıqtaǵı jańalıqlar haqqında atap ótti.
Bunnan aymaq nuranıyları hám taraw basshıları tárepinen imarat aldına tartılǵan dástúriy lenta kesilip, ilaj qatnasıwshıları jańa xızmet kórsetiw ornında xalqımız hám jumıs islewshiler ushın jaratılǵan sharayatlar menen jaqınnan tanıstı.
Zamangóy kórinistegi eki qabattan ibarat kadastr imaratı Aqtuba awıl puqaralar jıyını aymaǵında rayon xalqına sapalı xızmet kórsetiw ushın qolı gúl qurılısshılar tárepinen qurıp pitkerilip, paydalanıwǵa tapsırıldı.

Adilbay Orazov,
Qaraqalpaqstan xabar agentligi sholıwshısı.