Nókis qalasında jámiyetlik transport xızmetin rawajlandırıw maqsetinde, «Sapsan Trans Nukus» kárxanası tárepinen Qıtay mámleketinen 24 mlrd. sumlıq qarjı esabınan 12 elektrobus alıp keliw belgilengen bolıp, dáslepki 4 elektrobus Nókis qalasına jetip keldi.

– Búgin-erteń qalǵan 8 elektrobus paytaxatımızǵa jetip keledi, – deydi Qaraqalpaqstan Respublikası Transport ministrliginiń baspasóz xatkeri Zahiyda Qaljanova. – Sonday-aq, Ózbekstan Respublikası Prezidentiniń tapsırması menen Nókis qalasına jámi 200 avtobus alıp keliniwi belgilengen bolıp, búgingi kúni kárxanalar tárepinen arnawlı avtotransportlardı alıp keliw ilajları kórilmekte. Bunnan tısqarı, «Sapsan Trans Nukus» kárxanası tárepinen Nókis qalasında 200 avtobus sıyımlılıǵına iye avtobus parkin qurıw jumısları ámelge asırılmaqta.
Álbette, transport tarawında júz berip atırǵan bunday jańalanıw hám ózgerisler xalqımızdıń múshkilin jeńilletiwde hám olardıń turmıs abadanlıǵın arttırıwda áhmiyetli orın tutadı. Bul jańadan alıp kelingen elektrobuslar transport tarawı tariyxında zer háripler menen jazıp qalınsa ájep emes.

Adilbay Orazov,
Qaraqalpaqstan xabar agentligi sholıwshısı.