Isbilermenler háreketi – Ózbekstan Liberal-demokratiyalıq partiyası hám Ózbekstan “Milliy tiklanish” demokratiyalıq partiyası frakciyalarınıń aǵzalarınan ibarat “Rawajlanıw blogı”nıń májilisinde Múrájatta alǵa qoyılǵan baslamalardıń mazmun-mánisin saylawshılarǵa jetkeriw, elimizdiń rawajlanıwına xızmet etetuǵın wazıypalardı ámelge asırıw processlerine belsene qatnasıw, bul baǵdarda áhmiyetli ilajlardı belgilep alıw máseleleri hár tárepleme dodalandı.

Keńeytilgen májiliste Múrájatta belgilep berilgen 6 tiykarǵı baǵdardı turmısqa engiziw, “Máhálleni rawajlandırıw hám jámiyetti ilgeriletiw jılı” Mámleketlik baǵdarlamasında názerde tutılǵan wazıypalardıń sózsiz orınlanıwın támiyinlew, “Ózbekstan – 2030” strategiyasın jańadan qabıl etiw maqsetlerine erisiw parlamentke ayrıqsha juwapkershilik júkleytuǵını atap ótildi.
ÓzLiDeP frakciyasınıń basshısı Aktam Hayitov Múrájatta belgilengen tiykarǵı baǵdarlar ÓzLiDeP saylawaldı baǵdarlamasında názerde tutılǵan maqset hám wazıypalarǵa tolıq sáykes keletuǵının atap ótti. Sonlıqtan, partiya hám onıń frakciyası bul reformalardı ámelge asırıwda, ekonomikanı kóteriw, jeke menshik múlkke qol qatılmaslıǵın támiyinlew hám isbilermenlik ushın jáne de qolaylı ortalıq jaratıw jolında juwapkershilik penen jumıs alıp baratuǵının aytıp ótti.
“Milliy tiklanish” DP frakciyasınıń basshısı Alisher Qodirov Múrájatta Ózbekstan rawajlanıwın jańa basqıshqa alıp shıǵıw boyınsha altı tiykarǵı baǵdar Jańa Ózbekstannıń qúdiretin jáne de arttıratuǵının atap ótti. Onda parlament aldına da bir qatar wazıypalar qoyılǵanı aytıldı.
Májiliste Múrájatta sáwlelengen barlıq tarawlardıń rawajlanıwı jolındaǵı ilajlarǵa itibar qaratılıp, olardıń orınlanıwın támiyinlewde parlament hám jámiyetshiliktiń qatnasın kúsheytiw áhmiyetli ekenligi atap ótildi.
Atap ótilgenindey, Múrájatta ádalatlı sud-huqıq sisteması baǵdarındaǵı reformalar dawam ettiriletuǵını, ásirese, korrupciyaǵa qarsı gúresiw bunnan bılay da jetilistiriletuǵını atap ótildi. Sebebi bul illet rawajlanıwǵa tosqınlıq, ádillik hám nızam ústinligin joldan shıǵaratuǵın jınayat bolıp esaplanadı. Prezidentimiz “korrupciyaǵa jol qoyıw reformalarımızǵa qıyanet bolıp esaplanadı”, dep biykarǵa atap ótpegen. Sol sebepli, barlıq uyımlarda komplaens hám korrupciyaǵa qarsı ishki qadaǵalawǵa juwapker orınbasar lawazımı engiziledi. Bul bolsa deputatlarǵa da úlken juwapkershilik júkleydi.
Deputatlar Múrájatta belgilengen tiykarǵı baǵdarlar partiyalardıń saylawaldı baǵdarlamasında názerde tutılǵan maqset hám wazıypalar menen tolıq sáykes ekenin atap ótip, bul wazıypalardıń orınlanıwın támiyinlewde belsene qatnasatuǵının bildirdi. Sonnan kelip shıǵıp, “Rawajlanıw blogı”nıń aldında turǵan áhmiyetli wazıypalar belgilep alındı.

Muhtarama Komilova, ÓzA