Nókis qalasındaǵı “Doslıq” maydanında ornatılǵan oraylıq shırsha átirapı hár kúni Jańa jıldı kútip alıp atırǵan paytaxtımız turǵınları hám miymanlarǵa tolıp, xalqımız kewilli dem almaqta. Úlken shırsha janında estradamızdıń jarqın juldızlarınıń atqarıwında koncert baǵdarlamaları, kewil ashar shıǵıwlar shólkemlestirilmekte.

Kúni keshe bul jerde Qaraqalpaqstan Respublikasına xızmet kórsetken artist Bayram Perdebaev hám Janob Rasul, Ilyas Baltabaev, Islam Muratbaev, Alisher Bayniyazov, sonday-aq, “Ayqulash” Qaraqalpaq mámleketlik milliy folklor ansambliniń xosh hawaz qosıqshıları hám ayaq oyınshılarınıń atqarıwındaǵı Jańa jıl bayramına baǵıshlanǵan koncert baǵdarlaması bolıp ótti.
«Qádirdanlarım, watanlaslarım, aǵa-ini hám apa-qarındaslarım, bársheńizdi kirip kiyatırǵan jańa – 2026-jıl bayramı menen qızǵın qutlıqlap, Jańa jıl xalqımız ushın baxıt-ıǵbal, tınıshlıq-tatıwlıq, qut-bereket jılı bolıwın tileymen», degen jaqsı tilekler hámmeniń kewlinde bar. Ol bul jerge jıynalǵan hár bir insannıń júzinde tarap turǵan nurdan, bir-birine bildirip atırǵan jaqsı tileklerinen kórinip turıptı.
Qánigelerdiń maǵlıwmatlarına qaraǵanda, Jana jıl – eski jıl tamam bolǵannan keyin baslanatuǵın gezektegi jıl; eski jıldıń tamamlanıwı hám jańa jıldıń baslanıwı belgilenetuǵın kún. Jıldıń baslanıwı sıpatında 1-yanvar biziń eramızǵa shekemgi 46-jılda Rim húkimdarı Yuliy Cezar tárepinen ornatılǵan.
Jańa jıl, standart waqıttı esapqa alǵan halda, Tınısh okeanında baslanadı, Kiribati Respublikasınıń Layn atawlarında birinshi bolıp kútip alınadı (UTC+14 (muwapıqlastırılǵan universal waqıt) zonası). Amerika Samoası, Miduey atawları hám Niue (UTC-11) xalqı Jańa jıldı eń keshigip – Layn atawlarındaǵı Kiribatida 2-yanvarda hám yarım túnnen keyin 1 saattan keyin kútip aladı.
Házirgi waqıtta 1-yanvar dúnyalıq bayram bolıp, dúnyanıń derlik barlıq mámleketlerinde eń tiykarǵı bayram sıpatında belgilenedi.
– Men jańa jıldı bayramlaw ushın bala-shaǵalarım menen rayonnan keldim. Xalqımız jańa jıldı jaqsı keypiyatta kútip almaqta. Bayramdı kewildegidey etip kútip alıwı ushın oraylıq shırsha átirapında barlıq sharayatlar jaratılǵan eken. Ásirese, balalarım attrakcionlarda oynap, átkónshek ushıp quwanıp atır. Usı Jańa jılda hár bir watanlasımızǵa jańa sheklerdi iyelewde, mámleketimizdiń sociallıq hám ekonomikalıq turmısında úlken tabıslar yar bolıwın tileymen, – deydi bayram qatnasıwshılarınan biri.
Elimiz boylap bayramǵa baǵıshlanǵan ilajlar dawam etpekte.

Á.Jiyemuratov,
Qaraqalpaqstan xabar agentligi