Jańa jıl bayramı aldınan respublikamıda kóplegen jańa imaratlar paydalanıwǵa tapsırılmaqta. Solar qatarında Xojeli rayonı Sport mektebine qaraslı jańadan qurıp pitkerilgen boks zalınıń ashılıw máresimi bolıp ótti.

Ilajǵa Qaraqalpaqstan Respublikası Sport ministri E.Qutıbaev, rayon hákimi J.Ermashev, rayon prokurı A.Xalimov, Mámleketlik salıq inspekciyası baslıǵı A.Smamutov, taraw juwapkerleri, nuranıylar, sportshı jaslar hám keń jámiyetshilik wákilleri qatnastı.
Bul imarattıń qurılıwına xalqımızdıń belsendiligi sebep bolıp, «Ashıq byudjet» málimleme portalında “Baslamalı byudjet” processinde 477 dawıs topladı hám jeńimpaz dep tabıldı. Nátiyjede “Baxıt Qurılıs” JShJ tárepinen 1 mlrd. 450 mln. sum qarjı esabınan barlıq qolaylıqlarǵa iye bolǵan jańa sport bazası qurıldı. Shıǵıp sóylegenler, bunday imkaniyatlar ushın húrmetli Prezidentimizge sheksiz minnetdarshılıǵın bildirip, sportshı balalarımızdıń keleshekte úlken nátiyjelerge erisiwine isenim bildirdi. Bunnan soń, jańa boks bazasında jas óspirimler arasında “Doslıq ushırasıwı” sıpatında birinshi bellesiwler baslap jiberildi.

Qaraqalpaqstan xabar agentligi