Tórtkúl rayonı Atajurt awıl puqaralar jıyını aymaǵında zamanagóy 210 orınlı mámleketlik mektepke shekemgi bilimlendiriw shólkemi tolıq qayta qurılıp, paydalanıwǵa tapsırıldı.

Usı joybar sheńberinde imarat barlıq talaplarǵa say jańalandı. Ulıwma 9 milliard 9 million sumǵa qarjılandırılǵan balalar baqshası qurılısında «Voris China» JShJnıń qurılısshıları jankúyerlik kórsetti.
– Jańa balalar baqshası barlıq sharayatlarǵa iye bolıp, qısqı máwsimde ıssılıq tarmaǵı, balalar ushın qolaylı oqıw xanaları, jataqxana, asxana, oyın maydanshaları hám dem alıw orınların óz ishine alǵan, – deydi jıyın turǵını Gulchexra Axmedova. – Jańa baqshada balalarımızdıń fizikalıq hám intellektuallıq rawajlanıwı ushın barlıq sharayatlar bar.
Shólkemdi paydalanıwǵa tapsırıw ilajında rayon hákimligi, jámiyetshilik wákilleri, ata-analar hám tárbiyashılar qatnastı. Shıǵıp sóylegenler awıl xalqın jańa imarat penen qutlıqladı. Onıń kishi áwladtıń sawatlılıǵın arttırıw jolındaǵı áhmiyetine toqtap ótti.
Simvolikalıq lenta kesilip, jıynalǵanlar eki qabatlı imaratta jaratılǵan sharayatlar menen jaqınnan tanıstı.

Qaraqalpaqstan xabar agentligi