Igri jol menen pul tabıw jaqsı aqıbetlerge alıp kelmeytuǵınlıǵın kópshilik jaqsı biledi. Ásirese, ol urlıq jolı menen tabılǵan dúnya bolsa, bir kún kelip oǵan juwap beriwge tuwra keledi. Biraq, biz sóz etpekshi bolǵan jigitler bunı uǵıp jetpegen kórinedi.

Uluǵbek (atı ózgertilip alındı) óziniń aldın bir neshe márte sudlanǵanlıǵınan tiyisli juwmaq shıǵarmastan, Azamat (atı ózgertilip alındı) penen aldınnan jınayıy til biriktirip, ózgeniń mal-múlkin jasırın túrde talan-taraj etiw hám usı jol arqalı ańsat materiallıq baylıq arttırıw maqsetinde, 2024-jılı 22-iyun kúni azanǵı saat 04:30 larda Nókis rayonı aymaǵındaǵı mal bazarǵa keledi. Ol jerde bir bas qara malın satıw ushın kelgen, Shımbay rayonı turǵını Joldastıń (atı ózgertilip alındı) qasına barıp, aldınnan kelisilgen rejege kóre Uluǵbek onı gápke aylandırıp turǵanda sherigi Azamat hesh kimge bildirmesten iynine asıwlı turǵan sumkasınıń tómengi bólimin ótkir qural menen kesip, 10 million sumdı biymálel ózlestirip aladı.
«Dámikkennen qunıqqannan jaman» degendey, Uluǵbek sherigi Azamat penen mal bazardıń ishinen kelesi oljanı túsiriwge kirisedi. Mal bazar aymaǵında qara mal satıp alıw ushın kelgen Maxmudtıń qasına barıp, aldınnan kelisilgen rejege muwapıq onıń sumkasınan epshillik penen 20 million sumǵa iyelik etedi.
Biraq, bul istiń izi nasırǵa shawıp, waqıya jerinen jasırınıw ushın qashıp baratırǵan waqıtta irkilip, Maxmudtıń hadal miyneti menen tabılǵan pulı óz iyesine qaytarıldı.
Bunnan soń da Uluǵbek óziniń jınayıy háreketlerin bilqastan dawam ettirip, Tashkent qalası Qoylıq diyqan bazarında puqara Shaxsánemge tiyisli 7300 AQSh dolların jáne 2 million sum pulların, Nókis rayonı oraylıq diyqan bazarı aymaǵında bolsa, uyalı telefonlardı da urlap úlgeredi.
Jáne bir mısal. Puqara Tańatar (atı ózgertilgen) óziniń aldın sudlanǵanlıǵınan tiyisli juwmaq shıǵarmastan qáwipli recidivist bola turıp, spirtli ishimlik iship, más halında ózgeniń mal-múlkin talan-taraj etiw maqsetinde Sharapat penen aldınnan jınayıy til biriktiredi. Atap aytqanda, olar 2024-jılı 27-iyul kúni saat 10:00 lar shamasında Nókis rayonı oraylıq diyqan bazarı aymaǵında qarıydar sıpatında bazar aralap júrgen puqara Sárbinazdıń qasına kelip, onı óziniń hár túrli háreketleri menen aljastıradı hám itibarsız turǵanlıǵınan paydalanǵan jınayıy sherigi Sharapat sumkasınan 2 puqaralıq pasportı, pensiya gúwalıǵı, plastik karta hám 250 mıń sum muǵdarındaǵı pullardı alıwǵa erisedi.
Sońınan Tańatar óz sherigi menen keyingi oljanı qolǵa kirgiziwge kirisip ketedi. Olardıń keyingi nıshanı puqara Dáwletbiyke bolıp, onıń sumkasınan bir plastik karta hám 400 mıń sum muǵdarındaǵı pulların urlaydı.
Ańsat jol menen tabılǵan dúnyaǵa más bolǵan jınayatshılar ózleriniń hiylelerin dawam ettirip, bazar aralap kimniń uyalı telefonın, kimniń pulın ózlestirip júre berdi. Biraq… biraq hámme nárseniń de shegi boladı. Sol aytqanınday, huqıq qorǵaw uyımı xızmetkerleri tárepinen olardıń jeńil jol menen dúnya tabıwına shek qoyıldı.
Búgingi kúni jınayatshılar óz qılmısları ushın tiyisli jazaǵa tartıldı. Olar temir tordıń artında islegen qılmısları ushın pushayman bolǵan bolsa, ájep emes.

Raisa Bekmuratova,
Jınayat isleri boyınsha Kegeyli rayonı sudınıń baslıǵı.
Qaraqalpaqstan xabar agentligi