Ózbekstan Respublikası Prezidentiniń Oliy Majlis hám kóp milletli xalqımızǵa bıyılǵı múrájatı mámleketimizde alıp barılıp atırǵan reformalardıń insan mápine baǵdarlanǵanı, jámiyet turaqlılıǵı hám xalıqtıń abadanlıǵın támiyinlewde máhálle institutınıń ornı sheksiz ekenin jáne bir márte ayqın kórsetti.

Mámleketimiz basshısınıń atap ótkenindey, tariyx sınaqlarına bay bolǵan xalqımız hár qanday awır jaǵdayda da bárinen burın awızbirshilik hám tatıwlıqqa súyengen halda tabısqa erisken. Mine, usı awızbirshiliktiń negizi bolsa, máhálleden baslanadı.
Múrájatta atap ótilgenindey, qıyın kúnlerde shańaraq – shańaraqqa, qońsı – qońsıǵa iyinles bolıp, máhálle xalqı qıyınshılıqlardı birgelikte jeńip kelgen. Hár qıylı pikir hám kózqaraslardıń bar ekenligi demokratiyalıq jámiyettiń tábiyǵıy talabı ekeni tán alınıp, millet, til hám dinine qaramastan, 38 millionlıq xalqımızdı birlestiretuǵın joqarı ideya – Watan hám xalıq mápi ekeni ayrıqsha atap ótildi.
Áne usı ullı maqsetke erisiwde máhálle sistemasınıń ornı hám tásiri sheksiz. Máhálle tınısh hám tatıw bolsa, jámiyet te tınısh hám turaqlı boladı. Máhálle rawajlansa, pútkil mámleket rawajlanadı.
Solardı esapqa alǵan halda, Prezidentimiz 2026-jıldı mámleketimizde “Máhállelerdi rawajlandırıw hám jámiyetti ilgeriletiw rawajlandırıw jılı” dep járiyalaw baslamasın alǵa qoydı. Bul baslama máhálleni jámiyet rawajlanıwınıń tiykarǵı tayanıshı sıpatında jańa basqıshqa alıp shıǵıwǵa qaratılǵan áhmiyetli qádem bolıp esaplanadı.
Múrájatta belgilengen wazıypalar sheńberinde kelesi jıldan baslap máhálleni rawajlandırıw boyınsha jańa – kompleksli qatnas engiziletuǵını atap ótildi. Oǵan muwapıq, hár bir wálayatta 2-3 rayon tańlap alınıp, usı aymaqlardaǵı barlıq máhállelerde bar mashqalalardı bir waqıttıń ózinde sheshiwge qaratılǵan sistema jolǵa qoyıladı. Bul processte sociallıq tarawlar menen bir qatarda isbilermenlik infrastrukturasın rawajlandırıwǵa da ayrıqsha itibar qaratılıwı áhmiyetli.
Belgilengen maqsetlerdi ámelge asırıw ushın barlıq derekler esabınan jámi 8,5 trillion sum qarjı qaratılıwı rejelestirilgeni, deputatlarǵa óz saylaw okruglerindegi áhmiyetli mashqalalardı sheshiw ushın 500 milliard sum ajıratılatuǵını, sonday-aq, “jasıl aymaq” hám “jasıl baǵlar”dı qurıw baslamaların qollap-quwatlaw ushın qosımsha qarjılar belgilengeni bul reformalardıń ámeliy kórinisi bolıp esaplanadı.
Atap ótilgenindey, bul kompleksli qatnas arqalı 2030-jılǵa shekem sharayatı awır bolǵan barlıq rayonlardaǵı máhállelerge Jańa Ózbekstan kórinisin alıp kiriw, xalıq ushın múnásip turmıs sharayatların jaratıw maqset etilgen.
Juwmaqlap aytqanda, Prezidentimiz Múrájatında belgilengen wazıypalar máhálle institutına súyengen halda jámiyetti jáne de turaqlı hám rawajlanǵan basqıshqa alıp shıǵıw, xalıqtıń abadanlıǵın arttırıw hám mámlekettiń rawajlanıwın támiyinlewge xızmet etetuǵın bekkem baǵdarlamalıq tiykar bolıp xızmet etedi.

Nurlıbay Qayıpbergenov,
Ózbekstan “Adolat” SDP Qaraqalpaqstan Respublikası Keńesiniń baslıǵı.
Qaraqalpaqstan xabar agentligi