Múnásibet

Prezidentimizdiń Oliy Majliske hám Ózbekstan xalqına jollaǵan múrájatın úlken qızıǵıwshılıq penen tıńladıq. Mámleketimiz basshısı óziniń Múrájatında bıyılǵı jıl dawamında ámelge asırılǵan reformalar, erisilgen nátiyjeler hám jetiskenliklerdi hár tárepleme talladı jáne kelesi jıl ushın belgilengen tiykarǵı wazıypalar menen maqsetlerdi anıq belgilep, 2026-jıldı “Máhállelerdi rawajlandırıw hám jámiyetti ilgeriletiw jılı” dep járiyaladı. Mámleketimiz basshısı jaqın keleshekke mólsherlengen tiykarǵı maqset hám wazıypalarǵa baylanıslı tiykarǵı baǵdarlardı belgilep berdi.
Mámleketimiz basshısı xalqımızǵa hám Parlamentke jollaǵan múrájatında birde-bir tarawdı itibardan shette qaldırmadı.
“Máhálle bay bolsa, mámleket bay boladı, máhálle bekkem bolsa, mámleket bekkem boladı”. Máhállelerdiń ózine 20 trillion qarjı ajıratılıwı hám bunnan tısqarı ulıwma máhállelerde isbilermenlikti rawajlandırıw ushın 10 trillion, yaǵnıy, infrastruktura ushın ajıratılıwı, aymaqlarda sanaattı rawajlandırıw ushın jańadan-jańa joybarlar jolǵa qoyılıwı hám kelesi jılı jáne 50 milliard dollar investiciya, sırt el investiciyası rejeleri – bulardıń hámmesi ápiwayı aytılǵan sanlar emes, anıq mexanizmler tiykarında aytıldı hám olardıń hámmesin Mámleket basshısı birme-bir jol kartasında kórsetip berdi.
Atap ótilgenindey, máhálle – bul tek ǵana xalıqtıń jasaw ornı emes, al jámiyetshiliktiń awızbirshiligi, sociallıq turaqlılıq hám rawajlanıwdıń tiykarǵı tiregi de bolıp esaplanadı. Sonıń ushın da, Jańa Ózbekstanda máhállege xalıq penen mámleket arasındaǵı isenim kópiri sıpatında itibar qaratılmaqta. Máhállede “jetilik” sistemasınıń engizilgeni bolsa, reformalardıń nátiyjeliligin arttırdı, bul sistema arqalı 100 den aslam xızmetler máhálle dárejesine túsirildi hám Múrájatta atap ótilgenindey, 7,5 million puqara kámbaǵallıqtan shıǵarıldı, jumıssızlıq dárejesi bolsa, eki esege qısqardı.
Sonday-aq, Múrájatta ekonomikamız haqqında sóz etilgende, kópshiligimiz ushın burınları 100 milliard dollarlıq shek orınlanbaytuǵın árman sıyaqlı kórinetuǵın edi. Biraq, miynetimizdiń jemisi sıpatında bıyıl tariyxımızda birinshi márte jalpı ishki ónimimiz 145 milliard dollardan astı. Bul tek ǵana úlken san emes, bul – elimizde mıńlaǵan jańa kárxanalar ashılǵanı, adamlarımızdıń jumıslı bolıp atırǵanınan derek beredi. Eksportımız da 23 procentke ósip, 33,4 milliard dollarǵa jetkeni dúnya bazarında ózbek ónimine talap artıp atırǵanın kórsetedi.
Házirgi waqıtta jańa texnologiyalar, sanlastırıw hám jasalma intellekt tásirinde dúnyada jumıs orınlarınıń sanı, túri hám mazmunı keskin ózgermekte. Jaqın bes jılda bar kásiplerdiń 30 procenti tolıq avtomatlastırıladı, al 50 procenti boyınsha jańa mamanlıqlar talap etiledi. Prezidentimizdiń atap ótkenindey, sanaatta avtomatlastırılǵan liniyalar, agrar tarawda aqıllı texnologiyalar hám transportta intellektuallıq basqarıw kúndelikli turmısqa kirip keldi. Sonlıqtan mámleketimiz miynet bazarı kásip, mamanlıq, texnologiya hám bilimlendiriwdi birlestiretuǵın birden-bir mexanizm sıpatında islewi kerek. Bul processte texnikumlarǵa zamanagóy ortalıq jaratıwshı institut sıpatında qaralmaqta. Atap ótiliwinshe, 2026-jıldan baslap hár jılı keminde 100 texnikum tolıq ońlanıp, talap joqarı kásiplerge sáykes úskenelenedi.
Ulıwmalastırıp aytqanda, Prezidentimiz belgilep bergen bul tiykarǵı wazıypalar Jańa Ózbekstanda insan qádiri, ádillik hám abadanlıqtı támiyinlew jolında áhmiyetli baǵdarlama bolıp xızmet etedi.

Gúljan Xalmuratova,
Oliy Majlis Nızamshılıq palatasınıń deputatı, ÓzLiDeP frakciyasınıń aǵzası.
Qaraqalpaqstan xabar agentligi.