Respublikamızdıń barlıq aymaqlarında bolǵanı sıyaqlı, Kegeyli rayonında Jańa jıl bayramı múnásibeti 22 balaǵa Ózbekstan Respublikası Prezidenti atınan sawǵalar tapsırıldı.

Ilajda rayon hákimi A.Kamalov, rayon prokurorı I.Abdullaevlar shıǵıp sóylep, balalardı jańa jıl bayramı menen qutlıqladı hám olarǵa ózleriniń eń jaqsı tileklerin bildirdi.
Ótkerilgen ilajda húrmetli Prezidentimiz tárepinen ósip kiyatırǵan jas áwlad wákillerine qaratılıp atırǵan itibar hám qollap-quwatlawdı ayrıqsha tilge alıp, bunday ǵamqorlıqları ushın Jurtbasshımızǵa ózleriniń tereń minnetdarshılıqların bildirdi.
Sonday-aq, usı kúni rayon hákimi A.Kamalov Jańa jıl bayramı múnásibeti menen rayondaǵı shańaraqlıq balalar úyine barıp, ol jerde tárbiyalanıp atırǵan jas óspirimlerge de Prezident sawǵaların tapsırdı.
Ótkerilgen bul ilaj mámleketimiz basshısınıń sociallıq qorǵawǵa mútáj balalarǵa bolǵan turaqlı itibarı hám ǵamqorlıǵınıń ámeliy kórinisi bolıp esaplanadı. Balalardıń júzlerindegi quwanısh hám kúlki Jańa jıl bayramınıń eń úlken sawǵası boldı.
Maǵlıwmat ushın aytatuǵın bolsaq, házirgi waqıtta Kegeyli rayonında 3 shańaraqlıq balalar úyleri shólkemlestirilgen.

Qaraqalpaqstan xabar agentligi