Qaraqalpaqstan kórkem óner sarayında Qaraqalpaqstan Respublikası Joqarǵı Keńesiniń Baslıǵı Amanbay Orınbaevtıń mádeniyat xızmetkerleri hám din wákilleri menen ushırasıwı ótkerildi.

Onda Joqarǵı Keńes Baslıǵı shıǵıp sóylep, sońǵı jılları elimizde Prezidentimiz tárepinen tek ǵana Qaraqalpaqstan ushın óz aldına qabıl etilgen qararlar hám pármanlar arqalı berilgen jeńilliklerdi keń túrde atap ótti. Ushırasıwda sonday-aq, ótken qısqa waqıt ishinde Qaraqalpaqstan tariyxı betlerinde ózine tán orın alǵan áhmiyetli jańalıqlar, búgingi kúnde ámelge asırılıp atırǵan keń kólemli iygilikli jumıslar, aldaǵı wazıypalar haqqında keń túrde sóz etildi.
Sonı da ayrıqsha aytıw kerek, jaqın qısqa waqıt ishinde Qaraqalpaqstanda shın mánisinde tariyxıy waqıyalar júz berdi. Tek ǵana Qaraqalpaqstan xalqı, isbilermenleri, xalıqtıń barlıq kategoriyaları ushın aldın bolmaǵan jeńillikler, kóplegen imkaniyatlar jaratıp berildi.
Ótkerilgen ushırasıwda barlıq iygilikli isler, turmıslıq reformalar, áhmiyetli baslamalar anıq mısallar menen kórsetip berildi.
Bunnan soń, qatnasıwshılardıń pikir-usınısları tıńlanıp, aldaǵı ámelge asırılıwı tiyis wazıypalar belgilep alındı.
Ushırasıw dawamında búgingi kúnde elimizdiń rawajlanıwı jolında múnásip úles qosıp atırǵan bir topar jámiyetlik belsendiler múnásip xoshametlendi.

Qaraqalpaqstan xabar agentligi