Elektr tarmaqları xızmetkerleri tárepinen Tórtkúl rayonında jasawshı puqara E.D. shańaraqlıq ustaxanasında elektr esaplaǵıshtan tısqarı tarmaqqa jalǵanǵanı anıqlandı.

Dáslepki esap-sanaqlarǵa bola, 96 million sumlıq elektr energiyası nızamsız jumsalıp, bul qaǵıydabuzıwshılıq arqalı “Aymaqlıq elektr tarmaqları” akcionerlik jámiyetine zıyan jetkerilgen.
Bul nızambuzıwshılıq isi Jınayat isleri boyınsha Xojeli rayonı sudında kórip shıǵılıp, jetkerilgen zıyandı “Aymaqlıq elektr tarmaqları” AJ “Energosawda” Qaraqalpaqstan filialı paydasına óndiriw haqqında 2025-jıl 26-sentyabr kúni húkim shıǵarılǵan.
Usı húkim tiykarında shıǵarılǵan orınlaw isi Májbúriy orınlaw byurosı Tórtkúl rayonı bóliminiń is júrgiziwine kelip túsken hám bólim mámleketlik orınlawshıları tárepinen orınlandı. Atap aytqanda, qarızdardıń atında “COBALT” markalı avtomashina bar ekenligi anıqlanıp, ol bólimniń mámleketlik orınlawshısı tárepinen tiyisli tártipte xatlawǵa alındı hám járiyma maydanshasına jaylastırıldı. Sonıń nátiyjesinde, qarızdar tárepinen jetkerilgen 96 million sum jınayıy zıyanlar usı jıldıń 1-dekabr kúni óndirilip, sud qararınıń orınlanıwı támiyinlendi.

Qaraqalpaqstan xabar agentligi